Azərbaycan Diplomatik Akademiyası (ADA) 2013-2014-cü tədris ilindən başlayaraq dövlət və ictimai münasibətlər üzrə (Bachelors of Public Affairs) yeni bakalavr proqramı təklif edir.
Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, tələbələr siyasət, iqtisadiyyat, idarəçilik, hüquq, etika və kommunikasiya sahələrinə aid dərslər keçəcəklər. Sonda bu mütəxəssislər ictimai siyasət, layihə və proqramların tətbiqi, dövlət və ictimai sektora aid məsələlərin təhlili, ictimai problemlərə dair məlumatın dəqiq qiymətləndirilməsi, liderlik və natiqlik bacarığı üzrə qabiliyyətlərə yiyələnəcəklər.
Dövlət və ictimai münasibətlər üzrə bakalavr proqramı çərçivəsində seçə biləcəyiniz ixtisaslar aşağıdakılardır:
- Yerli hökumətin inkişafı (Local government management)
- İqtisadi inkişaf (Economic development)
- Sosial siyasət (Social policy)
- Ətraf mühitin idarə edilməsi (Environmental management)
Proqramın strukturuna uyğun olaraq ilk tədris ilində tələbələr ictimai və humanitar elmlər, incəsənət, mədəniyyət, riyaziyyat və məntiqi düşüncə sahələrinə aid fənlər keçəcəklər.
Birinci ilin sonunda tələbələr ixtisas seçimi edib, növbəti üç il ərzində ixtisas fənləri keçəcəklər.
Proqram məzunlara müvafiq sahə üzrə nəzəri biliklərə, idarəçilik üzrə bacarıqlara, analitik düşünmə qabiliyyətinə, nəticələrin qiymətləndirilməsi metodlarına, ictimai-siyasi təhlil və tədqiqat üsullarına yiyələnmək imkanı verəcəkdir.
Proqrama yiyələnənlər gələcəkdə dövlət, yerli idarəetmə orqanlarında, ictimai təşkilatlarda, QHT-lərdə, xeyriyyəçilik təşkilatlarında, fondlarda, mətbuat orqanlarında, gənclər təşkilatlarında işləmək imkanına malik olacaqlar.
Tədris 4 illikdir və ingilis dilində aparılır. İngilis dilində bilik səviyyəsi məqbul olmayan tələbələr ADA-da bir il ingilis dili üzrə intensiv dərslər keçəcəklər.
Dövlət və ictimai münasibətlər üzrə bakalavr proqramına qəbul TQDK-nın III ixtisas qrupu üzrə aparılır.
Əlaqə üçün: Əhmədbəy Ağaoğlu küçəsi 11 | Bakı, Azərbaycan | AZ1008
Telefon: (+99412) 437 32 35; (+99412) 437 08 30 |
Faks: (+99412) 437 32 36
[email protected]
www.ada.edu.az
jpg_1765410473.jpg)
jpg_1765188547.jpg)
