"Avropa Parlamentinin ölkəmizə qarşı çirkin qarayaxma kampaniyası davam edir. Parlamentin deputatları kim daha çox özünü erməni mövqeyindən göstərəcək və ya kim Azərbaycana qarşı qarayaxma kampaniyasında fəal olacaq deyə sanki bir-biri ilə yarışa çıxıblar".

Bu sözləri "Azərbaycan" qəzetinə Milli Məclisin deputatı Tural Gəncəliyev deyib. O bildirib ki, ilk növbədə Avropa Parlamentində müzakirələr zamanı səsləndirilənlər xüsusilə COP29 sessiyasına qarşı açıqlamalar, böhtanlar və yersiz bəyanatlar olur. Çıxış edənlərin hər birinin COP29 sessiyasına qarşı nə qədər qərəzli, əsassız fikirlər söylədiyinin bir daha şahidi oluruq. Avropa Parlamentinin üzvləri COP29 sessiyasını Azərbaycanda insan hüquqları və ermənilərin hüquqları kimi məsələlər ilə qarışdırmağa cəhd edərək, ölkəmizə qarşı əsassız ittihamlar səsləndirirlər. "Azərbaycanda insan hüquqlarının pozulmasından dəm vuran deputatlar keçmiş azərbaycanlı məcburi köçkünlər, onların vəziyyəti, o cümlədən hazırda Qərbi Azərbaycan İcmasının üzvləri olan insanların hüquqları haqqında bir kəlmə də danışmırlar. Bu, onların nə qədər ikiüzlü, riyakar siyasət aparmasını göstərir. Azərbaycanla Avropa İttifaqı arasında neft kontraktlarının dayandırılmasını istəyən bu deputatlar xarici siyasət məsələlərindən nə qədər kənar olduqlarını göstərir, onlar yersiz şəkildə müdaxilələr, çağırışlar edərək öz aləmlərində Azərbaycana təzyiq göstərə biləcəklərini düşünürlər", - deyə T.Gəncəliyev əlavə edib.

Deputat qeyd edib ki, onlar Avropa İttifaqının özünün Azərbaycanla neft və alternativ enerji sahəsində sazişlərin bağlanmasının təşəbbüskarı olduğunu anlamaq istəmirlər. Avropa İttifaqı Azərbaycanın enerji resurslarının bu qitəyə nəql olunmasında əsas maraqlı tərəfdir. Bütün bunlar bir daha göstərir ki, Avropa Parlamentinin deputatları erməni havadarlarının və onlarla əlbir olan ölkələrin siyasi maraqlarından çıxış edirlər. Burada, xüsusilə, Fransanın və onun müttəfiqlərinin izi hiss olunur. Amma Avropa Parlamentinin bu siyasəti yeni deyil, hələ 1990-cı illərin əvvəllərindən ölkəmizə qarşı qarayaxma kampaniyası aparan bu təşkilat hər zaman öz riyakar üzünü göstərib.

T.Gəncəliyev vurğulayıb ki, həm Qarabağdan, həm də Qərbi Azərbaycandan olan yüz minlərlə azərbaycanlının fundamental hüquqları pozulanda, bir kəlmə belə danışmayan Avropa Parlamenti üzvləri indi "yüz min" erməninin hüquqları haqqında danışır və bunu ölkəmizə qarşı qərəzli şəkildə ifadə edir: "Bu da Avropa Parlamentinin insan hüquqlarında nə qədər selektiv, diskriminativ olduğunu, istədikləri vaxt insan hüquqlarından danışdıqları, azərbaycanlılara gəldikdə isə bu hüquqları tanımadıqlarını göstərməklə onların riyakarlığını sübut edir. Ancaq biz doğma torpaqlarımızdan, milli maraqlarımızdan bir addım da geri çəkilməyəcəyik. Bunu Avropa Parlamentinin deputatları yaxşı dərk etməlidirlər".

Əsmər QARDAŞXANOVA,

"Azərbaycan"