Kiyevdə “Hər kəsin öz səsi var, bizim bir ürəyimiz var” adlı Ukraynanın Milli Azlıqları və Yerli Xalqlarının Ümumukrayna Forumu keçirilib.
AZƏRTAC xəbər verir ki, Birləşmiş Ukrayna Azərbaycanlıları Konqresi və Ukrayna Azərbaycanlıları Radasının nümayəndələrinin də iştirak etdiyi tədbir çərçivəsində ölkədə ilk dəfə milli səviyyədə “Millətlərarası Harmoniya və Mədəni Müxtəliflik Günü” qeyd olunub. Bu bayram Ukrayna Prezidentinin 2024-cü il 27 dekabr tarixli Fərmanı ilə təsis edilib. Bayramın məqsədi ölkədə yaşayan bütün milli icmaların və yerli xalqların unikal dəyərlərinin tanınması və ümumi Ukrayna mədəniyyətinin zənginləşdirilməsidir.
Forumda 300-dən çox iştirakçı - milli azlıqların və yerli xalqların nümayəndələri, hökumət rəsmiləri, diplomatlar, beynəlxalq tərəfdaşlar və ictimai xadimlər bir araya gəlib. Çıxışlarda Ukraynanı vətən hesab edən hər bir etnosun mədəni və dini adət-ənənələrinin eşidilməsi və anlaşılması, onların öz mədəni və etnik kimliklərini sərbəst şəkildə ifadə etmələrinin vacibliyi vurğulanıb.
Ukrayna Ali Radası sədrinin birinci müavini Oleksandr Kornienko tədbirdə çıxışı zamanı milli icmaların ümumi Ukrayna irsinə verdiyi töhfələrin əhəmiyyətinə diqqət çəkib: “İlk dəfə Millətlərarası Harmoniya və Mədəni Müxtəliflik Gününü qeyd etməklə, biz hər bir icmanın Ukrayna mədəni irsinə verdiyi unikal töhfəni şərəfləndiririk. Ukraynanın gücü birliyimizdədir – burada hər kəsin öz səsi var, lakin bizdə bir ürək var. Bu birlik bizi Avropa ilə inteqrasiya və ortaq uğura aparır”, - deyə o bildirib.
O.Kornienko, həmçinin çıxışı zamanı Azərbaycan dövlətinə, Prezidentinə və diaspor təşkilatlarına göstərilən dəstəyə görə xüsusi təşəkkürünü ifadə edib.
Tədbir çərçivəsində müxtəlif xalqların nümayəndələri, o cümlədən etnik azərbaycanlılar adından ağac əkilib. Forumda iştirak edən Birləşmiş Ukrayna Azərbaycanlıları Konqresinin Aparat rəhbəri Xəyyam Həqiqətoğlu etnik azərbaycanlılar adından Oleksandr Kornienkoya İkinci Qarabağ müharibəsinin simvollarından birinə çevrilən “Dəmir Yumruq” diplomunu hədiyyə edib.
jpg_1749076194.jpg)
