İndi Ermənistan adlandırılan qədim Qərbi Azərbaycandan, o sıradan İrəvan şəhərindən, kənd və qəzalardan ötən əsrin əvvəllərində daşnaksütyun silahlıları və bolşevik birləşmələri tərəfindən zorla qovulan, hətta 1948 və 1953-cü illərdə dövlət səviyyəsində məcburi deportasiyaya məruz qalan insanlar əzəli yurd yerlərinə qayıtmaq arzusu ilə yaşayırlar. Bu israrlı tələbin reallaşması üçün Qərbi Azərbaycan İcması, o cümlədən icmanın Qadınlar Şurası böyük fəallıq göstərir.
Şuranın təşkilatçılığı ilə bu günlər onlayn formatda "Qaçqınlıq və Qadınlar" mövzusunda keçirilən beynəlxalq konfransda qərbi azərbaycanlı qadınların etnik təmizləməyə məruz qalmaları və öz yurdlarına qayıda bilməmələrindən irəli gələn hüquq pozuntularından, haqqın-ədalətin bərpasında tarixi faktlar və arxiv sənədləri barədə əsaslı məlumat verilmişdir. Sonda konfrans iştirakçıları adından beynəlxalq ictimaiyyətə müraciət qəbul edilmişdir. Müraciət BMT-nin Baş Assambleyasının və Təhlükəsizlik Şurasının rəsmi sənədi kimi yayılmışdır. Təbii ki, sənədin BMT-nin ali orqanlarının rəsmi sənədi kimi yayılması Qərbi Azərbaycan məsələsi üzrə beynəlxalq məlumatlılığın artmasında mühüm rol oynayacaq.
Şura üzvləri mədəni irsin qorunması, tarixi abidələrin bərpası, habelə öz dədə-baba yurdlarından zorla qovulan ailələrin geri qayıdışı üçün Ermənistan hökumətindən sivil qaydada lazımi şərait yaradılmasını, beynəlxalq səviyyədə təminat verilməsini tələb edirlər və öhdələrinə düşən vəzifələri yerinə yetirmək üçün haqq səslərini bütün dünyaya çatdırırlar. Bu baxımdan mayın əvvəlində Qərbi Azərbaycan İcmasının Qadınlar Şurası, ABŞ-nin Şimali Karolina Universitetinin Sülh və Münaqişə Araşdırmaları Departamenti və Amerika-Türkiyə Assosiasiyası Assambleyasının birgə təşkilatçılığı ilə "Dəyişən dünyada birgə və sülh şəraitində yaşamağın mümkünlüyü" mövzusunda keçirilən növbəti onlayn beynəlxalq konfransının böyük əhəmiyyəti var. 10-dan çox xarici ölkədən 200-ə yaxın iştirakçının qatıldığı konfransda dünyanın tanınmış siyasətçiləri, vətəndaş cəmiyyəti liderləri, ABŞ, Kanada və İspaniya kimi ölkələrin nüfuzlu universitetlərinin alim və mütəxəssisləri çıxış etmişlər. Sonda konfrans iştirakçıları adından qərbi azərbaycanlıların qayıdış hüququnun təmin olunması ilə bağlı BMT-yə və digər beynəlxalq təşkilatlara müraciətlər göndərilmişdir.
Qadınlar Şurası ölkəmizin bölgələrində də maarifləndirici tədbirlər keçirir. Bu sıradan növbəti tədbir Ağsaqqallar Şurası, İcbari Tibbi Sığorta Dövlət Agentliyi və TƏBİB nümayəndələrinin iştirakı ilə Tərtər rayonunda baş tutub. Tərtər Rayon İcra Hakimiyyətinin təşkilatçılığı ilə tibbi humanitar aksiya çərçivəsində rayonun Bəyimsarov kəndində məskunlaşmış Qərbi Azərbaycanəsilli qaçqınların tibbi müayinəsi aparılıb.
Daha sonra şəhid ailələri ziyarət edilib. Tədbir çərçivəsində həmçinin görkəmli oftalmoloq-alim, tanınmış səhiyyə təşkilatçısı, akademik Zərifə xanım Əliyevanın xatirəsinə həsr edilmiş "ZƏRİFƏ ƏLİYEVA: Əbədi İşıq Mücəssəməsi" mövzusunda konfrans keçirilib. Konfransın moderatoru, Milli Məclisin deputatı, Qərbi Azərbaycan İcması Qadınlar Şurasının sədri Məlahət İbrahimqızı, Milli Məclisin deputatı, Səhiyyə komitəsinin sədri, icmanın Ağsaqqallar Şurasının sədri akademik Əhliman Əmiraslanov, icmanın idarə heyətinin üzvü, ADPU-nin prorektoru professor Mahirə Nağıqızı, İcbari Tibbi Sığorta Dövlət Agentliyi idarə heyətinin sədri Zaur Əliyev və başqaları akademik Zərifə xanım Əliyevanın ömür yolundan, yüksək nailiyyətlərindən, peşəsinə sevgisindən danışıblar.
Rəhman SALMANLI,
"Azərbaycan"
jpg_1749076194.jpg)
