Maliyyə Elm-Tədris Mərkəzinin təlimləri uğur vəd edir

Bunu Dövlət İmtahan Mərkəzinin keçirdiyi imtahanın nəticələri də göstərir

Azərbaycanda mühasibatlıq sahəsində mühüm yeniliklərdən biri müasir çağırışlardan irəli gələrək mühasiblərin peşəkarlıq sertifikasiyasının həyata keçirilməsidir. Mühasiblər çalışdıqları sahələrin məzmununa uyğun olaraq Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları üzrə, Maliyyə Hesabatlarının Beynəlxalq Standartları və İctimai Sektor (Büdcə Təşkilatları) üçün Mühasibat Uçotunun Beynəlxalq Standartları üzrə peşəkarlıq sertifikatlarına malik olmalıdırlar.
Məsələ ilə bağlı Azərbaycan Respublikasının Maliyyə Nazirliyi yanında Maliyyə Elm-Tədris Mərkəzindən (METM) aldığımız məlumata görə, bu sertifikatları əldə etmək üçün müəyyən edilmiş müddət gələn ilə qədər başa çatacaq. Belə ki, iri və orta sahibkarlıq subyektlərinin, paylarının nəzarət zərfi dövlətə məxsus olan hüquqi şəxslərin və qiymətli kağızları fond birjasında dövriyyədə olan hüquqi şəxslər istisna olmaqla, digər ictimai əhəmiyyətli qurumların baş mühasibləri  2023-cü il dekabrın 30-dək müvafiq peşəkar mühasib sertifikatına malik olmalıdırlar. İllik maliyyə hesabatlarını və ya birləşdirilmiş maliyyə hesabatlarını dərc edən publik hüquqi şəxslərin 2023-cü il yanvarın 1-dək işə qəbul edilən, habelə büdcə təşkilatlarının 2023-cü il yanvarın 1-dək işə qəbul edilən baş mühasibləri 2024-cü il 30 dekabradək peşəkar mühasib sertifikatı almalıdırlar. Bununla yanaşı, bir vacib nüansı da vurğulamaq lazımdır ki, illik maliyyə hesabatlarını və ya birləşdirilmiş maliyyə hesabatlarını dərc edən publik hüquqi şəxslər və büdcə təşkilatları 2023-cü il yanvarın 1-dən sonra müvafiq peşəkar mühasib sertifikatına malik olmayan baş mühasibləri işə qəbul edə bilməzlər.
Qeyd edək ki, Maliyyə Elm-Tədris Mərkəzi peşəkarlıq sertifikatı əldə etmək istəyənlər üçün təlimlər keçirən peşəkar qurumdur. Mərkəzdə təlimlər Dövlət İmtahan Mərkəzinin proqramı əsasında, beynəlxalq təcrübəyə, yeni və innovativ çağırışlara uyğun olaraq, peşəkar mütəxəssislər tərəfindən keçirilir. İştirakçılar təlim zamanı proqrama uyğun olaraq, kağız və elektron formada tədris vəsaitləri ilə təmin olunurlar. Mərkəzdə təlimlər əyani, intensiv, hibrid (əyani və onlayn) formatda təşkil olunur.
METM-nin mühasiblər üçün təlimlərinin ən yüksək səviyyədə və olduqca peşəkarcasına təşkil edildiyini Dövlət İmtahan Mərkəzinin bununla bağlı son imtahanının nəticələri də təsdiq edir. Belə ki, bu ilin sentyabr ayında peşəkar mühasib sertifikatını almaq üçün keçirilmiş imtahanın birinci mərhələsində Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları üzrə peşəkarlıq sertifikatı əldə etmiş 8 mühasib, İctimai Sektor (Büdcə Təşkilatları) üçün Mühasibat Uçotunun Beynəlxalq Standartları üzrə isə peşəkarlıq sertifikatı əldə etmiş 22 mühasib Maliyyə Nazirliyi yanında Maliyyə Elm-Tədris Mərkəzinin təlimlərində iştirak etməklə imtahana hazırlaşıblar. Onlardan 5 nəfər imtahanda xüsusilə fərqlənərək, yüksək bal toplayıb.
Maliyyə Nazirliyi yanında Maliyyə Elm-Tədris Mərkəzinin təlimləri davam edir. Məhz bu qurumun təlimləri hər bir mühasibə imtahanlardan müvəffəqiyyətlə keçmək üçün uğur vəd edir.

R.CƏFƏRLİ,
"Azərbaycan"