Hər bir valideyn ağır iş günündən sonra nə qədər yorğun olursa-olsun, uşaq bağçasından qayıdan körpəsinin baxışlarına diqqət yetirir, təbəssümlü çöhrəsini görəndə sevinir. 
Övladları əmin əllərə etibar edilən nümunəvi tərbiyə müəssisələrindən biri də Sumqayıt şəhər Hacı Zeynalabdin qəsəbəsində yerləşən 60 saylı "Qərənfil" körpələr evi-uşaq bağçasıdır. 
Böyüklərin xasiyyəti müxtəlif olduğu kimi, uşaqların da dünyaya baxışı müxtəlifdir. Biri sakit əyləşib oynayır, biri tərbiyəçinin ətəyindən yapışıb ondan əl çəkmir, digəri isə asfalt üzərində şəkil çəkir. Bu bağçada təmizlik və səliqə-sahman  hökm sürür. Maraq doğuran bütün guşələr diqqəti cəlb edir.
 "Qərənfil" 150 yerlikdir.1984-cü ildə öz qapılarını fidanların üzünə  açıb. Bir müddət 12 qrup fəaliyyət göstərib. Burada vaxtilə məcburi köçkünlər yerləşdiyi üçün qrupların sayı 8 olub. Hazırda 148 uşaqla 1 baş tərbiyəçi, 12 tərbiyəçi və 2 musiqi müəllimi  məşğul olur. Onlar işlərini məsuliyyətlə, vicdanla, sevə-sevə yerinə yetirirlər. Bağçada fəaliyyət planına uyğun olaraq, tədbirlər həyata  keçirilir, monitor vasitəsilə uşaqlarla aparılan tərbiyə prosesi izlənilir. Qidalanma da yüksək səviyyədədir. Yeməklərin hazırlanmasında uşaqların istəyi də nəzərə alınır. 
"Qərənfil"də vaxtilə bağçada tərbiyə almış Şuşa fatehi, atıcı-əsgər Telman Abışovun anası Şərifə xanım, iki qazinin ömür-gün yoldaşları, bir qazi anası, digər hərbçilərin ailə üzvləri çalışırlar. 
Bəli, bu təlim-tərbiyə müəssisəsində işlər günün tələbləri səviyyəsində qurulub,  valideynlərlə sıx əlaqə yaradılıb. Valideynlər vaxtaşırı qruplarda olur, uşaqlarla iş prosesinə qoşulur, tərbiyəçilərlə birgə mövzuya  uyğun vəsaitlər hazırlayırlar. Aybəniz, Həsən, İnci, Aliyə, Əli, Ayan, Xədicə və başqa balaların şirin-şəkər  çöhrələri isə elə bağçanın simasıdır.

İlhamə MƏHƏMMƏDQIZI,
Hacı Zeynalabdin Tağıyev qəsəbəsi