Türkiyə ölkə gündəmindən terror problemi məsələsini tamamilə çıxarmaq hədəfinə doğru qətiyyətlə irəliləyir. Bu gün “Terrorsuz Türkiyə” yolunda kritik mərhələ geridə qalıb.
AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan Ankarada keçirilən hökumətin iclasının yekunlarına dair bəyanatla çıxış edib.
Türkiyə lideri PKK-nın buraxılması ilə bağlı qərardan sonra yeni bir səhifənin açılacağına ümid etdiyini bildirib. “Terrorçular silahları yerə qoyacaqlarını bəyan ediblər. Bu qərarı önəmli hesab edirik. Terrorçu təşkilat tamamilə aradan qaldırıldıqdan sonra yeni bir səhifə açılacaq. İmperialistlərin planlarına ölümcül zərbə vurulacaq. Qalib gələn Türkiyə və türk xalqı olacaq”, – deyə o vurğulayıb.
Ərdoğan bəyan edib ki, Türkiyənin dövlət qurumları, o cümlədən xüsusi xidmət orqanları bu prosesin gedişini diqqətlə izləyəcəklər.
Türkiyə Prezidenti, həmçinin beynəlxalq gündəmlə bağlı məsələlərə də toxunub, o cümlədən Ukraynadakı vəziyyətə münasibət bildirib. Ərdoğan xatırladıb ki, bundan əvvəl Fransa Prezidenti Emmanuel Makron və Rusiya Prezidenti Vladimir Putinlə telefon danışıqları aparıb.
“Bir müddət əvvəl Ukrayna Prezidenti Volodimir Zelenski ilə də danışığımız oldu. Əziz dostum ABŞ Prezidenti Donald Trampın münaqişələrin diplomatik yolla həllinə yönəlmiş səylərini dəstəkləyirik. 2022-ci ildə tərəflər Rusiya-Ukrayna böhranını həll etməyə çox yaxın idilər, lakin bu baş tutmadı. Hazırkı mərhələdə Rusiya, Ukrayna, Amerika və Avropa danışıqların yenidən başlanmasının zəruriliyində ortaq mövqe nümayiş etdirirlər. Türkiyə bu prosesə töhfə verməyə, öz meydanını təqdim etməyə hazırdır”, – deyə Ərdoğan bildirib.
O əlavə edib ki, bu məsələdə yeni imkanlar səhifəsi açılıb. Ümid edib ki, bu dəfə fürsət əldən verilməyəcək.
Ərdoğan, həmçinin Cənubi Asiyada Pakistan və Hindistan arasında baş verən son gərginliklə də bağlı fikirlərini bölüşüb. O, İslamabad və Yeni Dehli arasında əldə olunan atəşkəs razılaşmasından Ankaranın məmnunluğunu ifadə edib. “Gərginliyin artdığı bir vaxtda biz qardaş Pakistanı açıq şəkildə dəstəklədik. Təxribatlara yol verilməməsinə çağırırıq. Biz həm sevincli, həm də kədərli günlərində İslamabadın yanında olacağıq”, – deyə Türkiyə Prezidenti vurğulayıb.
Qeyd edək ki, Prezident Administrasiyasının binasında keçirilən Nazirlər Kabineti iclası zamanı zala Türkiyə bayrağı formasında 102 güldən ibarət buket qoyulub. Bu təşəbbüs Milliyyətçi Hərəkat Partiyasının sədri Dövlət Baxçelidən gəlib. O, buketi Türkiyənin “terrorsuz ölkə” hədəfinə doğru qət etdiyi yolun rəmzi” kimi təqdim etdiyini bildirib. Partiya sədri vurğulayıb ki, “ölkədə 47 il davam edən qanlı terror səhifəsi artıq bağlanmalıdır”.
jpg_1750284293.jpg)
jpg_1749076194.jpg)
