Biz Azərbaycan Kosmik Agentliyi – “Azərkosmos” ilə çox sıx əməkdaşlıq edirik. Belə ki, “Azərkosmos” və “Star.Vision” şirkəti iqlim dəyişikliyinin Xəzər dənizinə təsirinin öyrənilməsinə yönəlmiş birgə tədqiqat layihəsinin həyata keçirilməsinə başlayıblar. Monitorinq zamanı şirkətimiz Azərbaycanda iqlim dəyişikliyinin Xəzər dənizinin sahil zolağının dayazlaşmasına təsirini aşkar edir. Bu, nisbətən uzunmüddətli - 1994-cü ildən 2024-cü ilə qədərki müqayisədir.
Bu barədə Çinin “Star.Vision Aerospace Group Limited” şirkətinin nümayəndəsi Brüs Vey Bakıda keçirilən “STC2025” kosmik texnologiya konfransı çərçivəsində AZƏRTAC-a açıqlaması zamanı deyib.
“Beləliklə, biz 30 il ərzində Xəzərin sahil zolağında baş verən dəyişikliklərin monitorinqini apardıq və nümayiş etdirdik ki, məsafədən zondlama ətraf mühitə dair müşahidələrimizi həqiqətən də təkmilləşdirə bilər. Bu layihə Azərbaycan və Çin arasında innovativ texnologiyalardan istifadə etməklə ətraf mühitin mühafizəsi sahəsində, o cümlədən kosmik texnologiya, süni intellekt və Yerin uzaqdan monitorinqi sahələrində davamlı əməkdaşlığın gücləndirilməsi üçün stimul rolunu oynayır”, - deyə agentliyin nümayəndəsi qeyd edib.
“Star.Vision”da biznesin inkişafı ilə məşğul olduğunu vurğulayan Brüs Vey deyib: “Şirkətimizin şüarı “Kosmik texnologiyalar hamı üçün”dür. Biz Yer kürəsində hər kəsə xidmət edə biləcək ümumi bir bürc qurmaq istəyirik. Biz peyk görüntüləri və əlavə xidmətlər təklif edirik”.
O, “Azərkosmos”la münasibətlərin dinamik inkişafına və əməkdaşlığın genişləndirilməsinə diqqət çəkərək əlavə edib: “Dünən STC2025 konfransında “Azərkosmos”un nümayəndələri ilə çox səmərəli görüş keçirdik. Biz “Azərkosmos”un peyk seriyamızı, eləcə də peyk şəkillərini necə öyrənəcəyi ilə bağlı razılığa gəldik”.
Çin şirkətinin nümayəndəsi Azərbaycan ilə Çin arasında dostluq və xoş münasibətlərin olduğunu qeyd edərək deyib: “Bir gün əvvəl Azərbaycan Prezidenti İlham Əliyev Çinə dövlət səfəri edib. Ölkələrimiz arasında qarşılıqlı əməkdaşlığa dair çoxlu sənədlər imzalanıb. Azərbaycan və Çin vətəndaşları üçün vizasız rejim yaradılır ki, bu da, biznes və ölkələrimiz arasında turizm mübadiləsinin inkişafına çox müsbət təsir göstərəcək. Çin və Azərbaycan arasında əməkdaşlığı gücləndirən bir çox siyasi məqamlar vardır. Mən bu proseslərin şahidi olmaqdan çox şadam”, - deyə Çin şirkətinin nümayəndəsi bildirib.
Bakıya ilk dəfə gəldiyini deyən Brüs Vey paytaxt barədə fikirlərini də əlavə edib: “Bura çox xoşuma gəlir - insanların qonaqpərvərliyi, mənzərələr və kosmik texnologiya üzrə bu konfrans da gözəl hadisədir. Buna görə də Çin və Azərbaycan arasında uğurlu münasibətlərin gələcəyinə inanıram. Bizim əməkdaşlıq edə biləcəyimiz bir çox sənaye sahələri var. Əslində “Star.Vision” və “Azərkosmos” bu iki ölkənin sıx əməkdaşlıq etdiyini əyani nümayiş etdirir”.
jpg_1747666271.jpg)
