Təəssüf ki, bu adi həqiqətə sahibkarların hamısı əməl etmir. Eləsi var ki, yay mövsümündə özü kənara çəkilir, elə müəssisə, elə təşkilat da var ki, işçilərinin istirahətini təşkil etmək üçün öncədən maraqlı turist marşrutlarını arayıb-axtarır. Bizim çalışdığımız "Azərikimya" İstehsalat Birliyində də bu sahədə xüsusi proqram hazırlanıb. Vəzifəsindən asılı olmayaraq, hər bir işçinin sağlamlığının qorunması, istirahətinin təşkili diqqət mərkəzindədir.

Əvvəlki illərdə olduğu kimi, kollektivin ümumi arzu və təklifləri nəzərə alınaraq birliyin həmkarlar ittifaqı komitəsinin xətti ilə ən səfalı guşələrindən olan İsmayıllı, Lerik, Balakən, Quba, Qusar və Xaçmazın istirahət mərkəzlərində işçilərimizin dincəlməsi təmin edilir. Yay mövsümünün əvvəlindən etibarən həmkarlar ittifaqının göndərişləri əsasında kimyaçılar ailəsinin 400 nəfərdən artıq üzvü Xəzərin meşəli sahillərində və səfalı dağlarda istirahət edə bilmişdir. 

ARDNŞ-nin müvafiq strukturları tərəfindən kimyaçıların istirahət zonalarına göndərilməsi, onların dincəlməsinin təşkil edilməsi və xərclərin böyük bir hissəsinin müəssisə tərəfindən çəkilməsi kimyaçıların iş yerlərinə yeni qüvvə və enerji, nikbin bir ovqatla qayıtmalarına səbəb olan amillərdəndir. Belə təmənnasız qayğı kimyaçıları sevindirir və daha həvəslə çalışmalarını, işlərində daha məsuliyyətli olmalarını stimullaşdırır. Bir sözlə, rəhbərlik işçilərinin, işçilər də iş  yerinin qədir-qiymətini bilirlər. 

İbad İBADOV,

etilen-polietilen zavodunun mühəndisi