"Azərbaycan yaxın illərdə alternativ enerji mənbələrindən geniş istifadə edən ölkələr sırasına daxil olacaq. Bunu Bakıda keçirilən GUAM Parlament Assambleyası ilə Baltik Assambleyasının "Sərhədlər üzərindən əlaqələrin qurulması" adlı birgə beynəlxalq konfransında sənaye və energetika nazirinin müavini Natiq Abbasov bildirib.

Onun sözlərinə görə, Azərbaycanda 800 meqavat külək, 1500-2000 meqavat günəş, kiçik su elektrik stansiyalarının inşasına imkan verən potensial var. Nazir müavini həmçinin qeyd edib ki, ölkəmiz Avropa və dünya bazarlarına gün ərzində 750-800 min barel xam neft çıxarır: "Azərbaycan GUAM üzvü olan ölkələri, Baltikyanı zonanı və Avropanın digər dövlətlərini əhatə edən enerji dəhlizlərində neft-qaz strukturunun və elektrik verilişi sistemlərinin gücləndirilməsi istiqamətində bir sıra layihələrin həyata keçirilməsində və dəstəklənməsində fəal iştirakçıdır".

Natiq Abbasovun sözlərinə görə, Avropa İttifaqı ilə Azərbaycan arasında enerji sahəsində yaranmış sıx əməkdaşlıq bu prosesə GUAM (Gürcüstan, Ukrayna, Azərbaycan, Moldova), Baltik Assambleyası (Litva, Latviya, Estoniya), Benilüks Parlamenti (Belçika, Niderland, Lüksemburq), Şimal Şurası (Danimarka, İslandiya, Norveç, Finlandiya, İsveç), Vişeqrad qrupu (Polşa, Çexiya, Slovakiya, Macarıstan) ölkələrini də cəlb edir.

Natiq Abbasov onu da vurğulayıb ki, AGRİ (Azərbaycan-Gürcüstan-Rumıniya) layihəsi, eləcə də Odessa-Brodı kəmərinin işə düşməsi ölkənin ixrac potensialını daha da artıracaq. Azərbaycan Cənub dəhlizində potensial marşrut kimi Transadriatik Boru Kəməri (TAP) layihəsini görür. Hazırda Azərbaycan qazı Yunanıstana nəql edilir, Gürcüstana qaz təchizatını həyata keçirir və bu ölkənin qaz şəbəkəsinin yenidən qurulmasını reallaşdırır.

"Azərbaycan"