Xocalı faciəsinin 29-cu ildönümü ilə əlaqədar fevralın 25-də Ailə, Qadın və Uşaq Problemləri üzrə Dövlət Komitəsinin (AQUPDK), Uşaq Səfirlər Məclisinin və Türkiyə Gənclik Fondunun birgə təşkilatçılığı ilə onlayn formatda beynəlxalq konfrans keçirilib. Əvvəlcə Xocalı faciəsinin qurbanlarının əziz xatirəsi bir dəqiqəlik sükutla yad olunub.

AZƏRTAC xəbər verir ki, tədbirdə bəşər tarixinin ən dəhşətli faciələrindən biri olan Xocalı soyqırımı haqqında danışılıb və bu faciəni törədənlər şiddətlə qınanılıb.

Uşaq Səfirlər Məclisinin həmsədri Nurlan Cəbrayılzadə yaşlıların, uşaqların, qadınların kütləvi surətdə və amansızlıqla qətlə yetirildiyini heç bir insanlığa sığmadığını diqqətə çatdırıb. O qeyd edib ki, 26 fevral tarixi etnik azərbaycanlıların soyqırımı tarixi kimi yaddaşlara həkk olunub. Bildirib ki, Xocalı soyqırımı nəticəsində 63-ü uşaq, 106-sı qadın olmaqla, 613 Xocalı sakini qətlə yetirilib. Mindən artıq insan əsir götürülüb ki, onların arasındakı 26 uşağın taleyindən bu günədək məlumat yoxdur: "Günahsız insanların, körpələrin amansızlıqla qətlə yetirilməsi erməni terrorunun və vəhşiliyinin bariz nümunəsidir. Amma heç bir cinayət cəzasız qalmır. Ermənilər də tarix və Azərbaycan xalqı qarşısında cavab verməli olacaqlar”. Onun sözlərinə görə, Azərbaycan 44 günlük Vətən müharibəsində qazandığı möhtəşəm Qələbə ilə erməni faşizminə ciddi zərbə vuraraq, öz ərazi bütövlüyünü bərpa etdi.

N.Cəbrayılzadə Türkiyə-Azərbaycan qardaşlığından, birlikdə həyata keçirilən layihələrdən də danışıb. O, ulu öndər Heydər Əliyevin "İki dövlət, bir millət" kəlamını misal gətirərək, qardaş Türkiyənin hər zaman Azərbaycanın yanında olduğunu bildirib.

Türkiyə Gənclik Fondunun nümayəndələri Erva Esma və Ahmet Tarık qardaş ölkələrimiz, xalqlarımız arasındakı münasibətlərdən danışıb və Xocalı soyqırımını törədənləri qınayıblar.

Sonra Uşaq Səfirlər Məclisinin üzvü Əsmər İsmayılovanın təqdimatında Xocalı faciəsi ilə əlaqədar video nümayiş etdirilib və faciə ilə əlaqədar statistik rəqəmlər diqqətə çatdırılıb.