Ucar şəhərindəki 3 nömrəli tam orta məktəbin binası 2011-ci ildə istifadəyə verilib. Regionların sosial-iqtisadi inkişafına dair Dövlət Proqramı xətti ilə inşa edilmiş bu ikimərtəbəli təhsil ocağı 220 şagirdlikdir.

Ancaq burada 248 şagird təhsil aldığına görə yardımçı binada əlavə sinif otaqları da ayrılıb. Üç laboratoriya və 16 kompyuter kollektivin sərəncamındadır.

Məzunların ali məktəbə qəbul göstəriciləri yüksək olmasa da, "Şahinlər" və "Cəsurlar" hərbi-vətənpərvərlik oyunlarında bu təhsil ocağı həmişə öncül yerlərdən birini tutur. Bu həm də məktəbin həyətində məşhur 416-cı Taqanroq diviziyasının şərəfinə ucaldılmış abidənin yaratdığı ovqatla da bağlıdır. Alman faşist işğalçılarına qarşı müharibə zamanı əfsanəvi diviziyanın bu məktəbin həyətində toplanış məntəqəsi fəaliyyət göstərib. Ucarlılar işğalçı düşmənə qarşı müharibəyə buradan yola düşüblər.

Məktəbin direktoru Vüqar Məlikov bildirdi ki, abidənin önündə keçirilən tədbirlər, müharibə veteranları ilə görüşlər şagirdlərin vətənpərvərlik ruhunun artırılmasına müsbət təsir edir. İlk dərslərin abidə önündə keçirilməsi də milli-tarixi keçmişə bağlılıq baxımından çox əhəmiyyətlidir. Qalır bircə məsələ-dövlətin qayğısı sayəsində inşa edilmiş bu müasir və yaraşıqlı məktəbdə daha yüksək təhsil göstəricilərinə nail olmaq. Axı canlarını işğalçı düşmənə qarşı döyüşlərdə fəda etmiş ata-babalar da övladlarımızı bilikli, bacarıqlı görməyi arzu edirdilər. Əminik ki, tezliklə bu təhsil ocağının da daha çox məzununun sorağı ali məktəblərdən gələcək. Yeni texnologiyalar dövründə bütün uğurların yolu elmdən, təhsildən keçir. Bunu Ucar şəhərindəki 3 nömrəli tam orta məktəbin şagirdləri də dərindən başa düşürlər.

Telman NƏZƏRLİ,

"Azərbaycan"