Qədim Gəncə şəhərində gündən-günə genişlənən abadlıq və quruculuq işləri hər kəsdə fəallığın yüksəlməsinə, yeni-yeni təşəbbüslərin yaranmasına səbəb olub.

Belə xeyirxah işlərdə Dövlət Aqrar Universiteti də həmişə ön sırada gedir. Qocaman təhsil ocağında maddi-texniki baza möhkəmləndikcə və tədrisin keyfiyyəti yüksəldikcə tələbələrin istehsalatla əlaqələrinin genişləndirilməsinə, hər kəsdə işgüzarlığın və müvafiq ixtisas üzrə əməli vərdişlərin artırılmasına, yüksək səviyyədə vətənpərvərlik hislərinin aşılanmasına xüsusi diqqət yetirilir.

Bu günlərdə tələbə gənclər təşkilatının təşəbbüsü ilə oğlan və qızlardan ibarət könüllü inşaat dəstəsi yaradılmışdır. İlk mərhələdə müraciət edən 100 tələbədən 59 nəfəri seçilmişdir. Onlar qış sessiyasının imtahanlarını vaxtından əvvəl verərək bu nəcib işə qoşulmuşlar. Hazırlıq ərəfəsində texniki təhlükəsizlik və əmək mühafizəsi üzrə təlimlər keçirilmiş, onlara bir sıra tövsiyə və tapşırıqlar verilmişdir.

Şəhərdə aparılan genişmiqyaslı abadlıq və quruculuq işlərinə kömək göstərilməsi üçün mənzil-kommunal təsərrüfatı tresti ilə müqavilə bağlanmışdır. Tələbə inşaat dəstəsinin üzvləri trestin sifarişi ilə ehtiyacı olan yerlərdə çalışaraq əməkhaqqı alacaqlar. Gənclərə xüsusi geyim forması və əmək alətləri verilmişdir. Onlar gündə bir dəfə pulsuz isti yeməklə təmin olunurlar.

Tələbə inşaat qərargahının rəisi dosent Nizami Seyidəliyev deyir ki, dəstənin üzvləri yanvar-fevral aylarında yaşıllaşdırma işləri aparacaq, şəhərin müxtəlif obyektlərində, xüsusən Gəncəçay hövzəsinin təmizlənməsində çalışacaqlar. İlk günlərdə onlar hava limanı ərazisində üç minə yaxın ağac əkmişlər. İlkin müqavilənin müddəti fevral ayının 10-a kimidir. Sonra tələbələr təhsillərinə davam edəcək, yay tətillərində isə müxtəlif yerlərdə işləyəcəklər.

Əhməd İSAYEV,

"Azərbaycan"