Biz fərqli zamanda yaşayırıq. Məsələn, ötən əsrin gəncliyi sovet təhsili alıb, romantik, ümumsovet ideyaları ilə yaşayıblar, çoxu kommunist ideyalarının tərənnümçüsü olub. İnsan fərd kimi arxa planda qalıb. İndi müstəqil dövlətimiz, sərbəst xarici və daxili siyasətimiz var. Atalarımız, babalarımız bu azadlıq uğrunda savaşlardan keçiblər. Artıq 20 ildən çoxdur ki, azad düşüncəli ölkənin vətəndaşlarıyıq. Əvvəllər olduğu kimi kiməsə böyük qardaş demirik. Öz müqəddəratımızı özümüz həll edirik, özümüz qərar veririk. Odur ki, bizim yolumuz babalarımızın, atalarımızın yolundan daha asandır. Gələcəkdə ölkəmiz üçün faydalı və bilikli mütəxəssis kimi yetişmək üçün qarşımızda böyük imkanlar mövcuddur.

Mən 1 nömrəli Sumqayıt şəhər tam orta məktəbində oxuyanda hərə öz gələcək arzusundan söhbət açardı. Sinif yoldaşlarımın çoxu texniki fənnlərə üstünlük verər, mənimsə xarici dili seçəcəyimi düşünürdülər.

Ölkəmizdə xeyli təhsilli müəllim də var, həkim də. Atam konservatoriyanı bitirib, anam isə xarici dil müəllimidir. Peşə seçimi ilə bağlı internet resurslarında axtarışlar aparanda başa düşdüm ki, seçdiyim ixtisas həm məni qane etməli, həm də ona elə tələbat olmalıdır ki, ali məktəbi bitirdikdən sonra işsiz qalmayım, yüksək maaşım, perspektivlərim olsun. Turizmin ölkəmizdə sürətlə inkişaf etməsini və bu sahədə mütəxəssislərə olan böyük ehtiyacı nəzərə alıb Azərbaycan Turizm İnstitutunun turizm və hotel işi fakültəsini seçdim. Qəbul imtahanında 616 bal yığdım. İndi burada ingilis dilində təhsil alıram və həm də bildiyim digər dillər üzərində çalışıram. Bilirəm ki, burada öyrəndiyim dil bilgiləri gələcək karyeramı qurmaq üçün həddən ziyadə zəruridir. Aldığım biliklər mənə həyatda arzularımı reallaşdırmağa, bacarıqlı mütəxəssis kimi yetişməyə kömək edəcək. Bilik nə qədər dərin və mükəmməl olarsa, insan da həyatda qarşısına çıxan maneələri bir o qədər asanlıqla dəf edər.

Sara RƏCƏBLİ,

Azərbaycan Turizm İnstitutunun tələbəsi