Səbail rayonunda aparılan yenidənqurma işləri sahəsində təhsil müəssisələrinin tikintisinə və əsaslı təmirinə xüsusi diqqət ayrılmışdır. Rayon icra hakimiyyətindən bildirmişlər ki, 2011-ci ildə 49 saylı "İntellekt" liseyinin həyətində yeni 660 şagird yerlik əlavə korpus tikintisi aparılmış və artıq bu il istifadəyə verilmişdir.

Burada tikinti işləri müasir standartlara uyğun, yüksək keyfiyyətlə görülmüş, 3 mərtəbəli, ümumi sahəsi 3 min kvadratmetr olan yeni tədris korpusu tikilmiş, fasad və divarlar üzlük daşla üzlənmiş, fasadın bir hissəsi rənglənmişdir. Korpusda 800 kvadratmetr sahəyə malik mansard tipli dam örtüyü quraşdırılmış, dama müasir şifer örtüyü vurulmuşdur. Məktəbin girişi və həyəti yenidən qurulmuş, yeni darvaza quraşdırılmış, həyət və ətraf əraziyə 1300 kvadratmetr asfalt örtüyü çəkilmiş, yaşıllaşdırma işləri aparılmışdır.

Məktəbin həyətində yeni qazanxana tikilərək müasir istilik avadanlığı ilə təchiz olunmuş, yeni su, işıq və kanalizasiya xətləri çəkilmiş, buranın sutka ərzində içməli su ilə təchizatı üçün müvafiq işlər görülmüşdür.

Yeni korpusdakı sinif otaqlarında müasir təhsil üçün hər cür şərait yaradılmış, siniflər yeni avadanlıq, partalar və dərs ləvazimatları ilə təmin olunmuşlar.

Hazırda rayon ərazisindəki 7 nömrəli orta məktəb üçün idman və akt zalları, 8 sinif və 1 müəllimlər otağı olan əlavə korpusun, həmçinin 3 nömrəli uşaq musiqi məktəbinin sökülərək yenidən tikintisi işləri, Badamdar qəsəbəsindəki "Könül" körpələr evində əsaslı təmir başa çatmaq üzrədir.

Həmçinin Bibiheybət qəsəbəsindəki 50 nömrəli orta məktəbin, Bayıl yaşayış sahəsindəki 49 nömrəli "İntellekt" liseyinin köhnə korpusunun və 203 nömrəli orta məktəbin binasının, 44 nömrəli uşaq bağçasının əsaslı təmiri aparılır.

AzərTAc