Şuşa Rayon İcra Hakimiyyəti (RİH) başçısının Şuşa şəhər inzibati ərazi dairəsi üzrə nümayəndəliyi tərəfindən ötən ildə görülmüş işlərə və qarşıda duran vəzifələrə dair hesabat iclası keçirilmişdir.

AzərTAc xəbər verir ki, Şuşa şəhər inzibati ərazi dairəsi üzrə nümayəndə Samir Rəhimov keçən il görülmüş işlər barədə iclasın iştirakçılarına ətraflı məlumat vermişdir. Bildirmişdir ki, 2011-ci ildə Prezident İlham Əliyevin məqsədyönlü iqtisadi siyasəti nəticəsində ölkədə inkişaf tempi yüksələn xətlə davam etmiş, əhalinin sosial rifahının yaxşılaşdırılması sahəsində mühüm işlər həyata keçirilmişdir.

Hesabat dövründə nümayəndəliyin təsdiq olunmuş iş planına əsasən fəaliyyət göstərdiyini bildirən S.Rəhimov qeyd etmişdir ki, 2011-ci ildə respublikanın Bərdə, Qəbələ, Ağcabədi, Ağdam rayonunun Mirzələr yatağı və digər rayonlarında məskunlaşmış şuşalılar ilə görüşlər keçirilmiş, onların problemlərinin aradan qaldırılması sahəsində bir çox tədbirlər görülmüşdür. Nümayəndə Şuşa əhalisinin bütün problemlərdən əvvəl Ermənistan-Azərbaycan, Dağlıq Qarabağ münaqişəsinin beynəlxalq hüququn normaları və prinsipləri çərçivəsində həll olunmasını səbirsizliklə gözlədiklərini, dövlət başçısının apardığı məqsədyönlü siyasəti  daim dəstəklədiklərini diqqətə çatdırmışdır.

Şuşa Rayon İcra Hakimiyyətinin başçısı Bayram Səfərov təməli ulu öndər Heydər Əliyev tərəfindən qoyulmuş möhkəm iqtisadi baza və ölkəmizin malik olduğu zəngin potensialın Azərbaycanın 2011-ci ildə də dönməz və dinamik tərəqqisinə əlverişli şərait yaratdığını bildirmişdir. B.Səfərov qeyd etmişdir ki, müstəqil iqtisadi siyasətə, beynəlxalq nüfuza malik Azərbaycan Respublikası dünyanın ən inkişaf etmiş dövlətlərindən birinə çevrilmişdir.

 Hesabat yığıncağında  Prezident Administrasiyasının məsul əməkdaşı Rövşən Ağayev, Milli Məclisin deputatı Elman Məmmədov və digərləri çıxış edərək Prezident İlham Əliyevin rəhbərliyi ilə həyata keçirilən genişmiqyaslı tədbirlərdən və Şuşa rayonunun icra strukturları qarşısında duran vəzifələrdən danışmışlar.