Rusiya Avropada Amerikanın RƏM sisteminin qurulmasına cavab olaraq hərbi-texniki xarakterli tədbirlər hazırlamağa başlamışdır. Bu barədə "Kommersant" qəzeti xəbər verir.

Kremldəki yüksək vəzifəli mənbə qəzetə bildirmişdir ki, Rusiya hakimiyyət orqanları "nə etmək lazım olduğunu anlayır": "Bizim cavabımız ucuz başa gələcək, lakin çox effektiv olacaq".

Mənbə Kremlin qərarını onunla izah etmişdir ki, amerikalılar Avropada RƏM sistemi qurarkən Rusiyanın mövqeyini nəzərə almırlar. Eyni zamanda, Moskva ABŞ Prezidenti Barak Obama vəzifəsindən getdikdən sonra bu məsələ ilə bağlı hansısa razılaşmalara yenidən baxıla biləcəyindən narahatdır.

Bu günlərdə ABŞ-ın Rusiyadakı gələcək səfiri Mayk Makfol Senatda dinləmələr zamanı demişdir ki, RƏM üzrə danışıqlar qarşısıalınmaz maneələrlə üzləşmişdir. Məsələn, ABŞ Amerikanın Avropadakı RƏM obyektlərinin Rusiyanın nüvə qüvvələrinə qarşı yönəldilməyəcəyi barədə hüquqi təminat verməyə hazır deyil.

Əvvəllər güman edilirdi ki, bu barədə təminatlar haqqında saziş gələn ilin mayında Rusiya-NATO sammitində Barak Obama və Dmitri Medvedev tərəfindən imzalanacaq. Lakin Rusiya Xarici İşlər Nazirliyindən "Kommersant"a bildirmişlər ki, Obama Pentaqon və Mərkəzi Kəşfiyyat İdarəsinin tövsiyəsi ilə sənədi imzalamaqdan boyun qaçıracaq.

NATO-nun Avropada RƏM sistemi gələn il işə düşəcək. Onun tam qurulması isə 2018-ci ildə başa çatmalıdır. 

ABŞ və digər Qərb ölkələrinin nümayəndələri bildirirlər ki, bu sistem İran və Şimali Koreyadan qaynaqlanan raket təhlükəsindən müdafiə üçün nəzərdə tutulmuşdur. Rusiya isə bu sistemin Avropada quraşdırılmasını milli təhlükəsizliyinə təhdid kimi qiymətləndirir.