Hörmətli redaksiya!

Abunəçisi olduğum "Azərbaycan" qəzetini digər qəzetlərlə bərabər  hər gün oxuyuram. Qəzetinizdə dərc olunan "Qızılağac qoruğu" və ona bənzər məqalələr məni ziyalı kimi ruhlandırır. Belə yazılar hamımızı maarifləndirir, ekoloji təmiz mühitdə yaşamağa sövq edir. Ona görə də redaksiyanızın yaradıcı kollektivinə səmimi təşəkkurlərimi bildirirəm.

"Qızılağac qoruğu" yazısı mənə uşaqlıq illərim keçən Rustov kəndini xatırlatdı. Çaqaçıq  və Kamal çaylarının sahillərində o zamanlar Qızılağac meşəlikləri, sərin bulaqlar var idi. Çaylar boyunca dəniz tərəfdən Şah dağın ətəklərinə doğru uçub gələn və yazda vətənlərinə qayıdan çay ördəkləri, qaşqaldaqlar, qazlar, qu quşları və digər köçəri quşlarla dolu olardı. Qızılağac meşəliyindən həyətimizə "qonaq" gələn tısbağalar, çaykənarı nohurlardakı şəffaf sularda üzən balıqlar, gecələr  eşitdiyimiz çaqqal, tülkü, canavar  səsləri, qaranlıqda fənər işığında donub qalan çöl dovşanları reallıqdan çox bizə şirin yuxuları xatırladır. İndinin özündə belə o zamankı Qızılağac meşəliklərinin həsrəti ilə yaşayırıq. Sanki o gözəlliklərlə bu gün də ruhumuz, beynimiz, zehnimiz qidalanır.

İndi Çaqaçıq çayının Kardas-Rustov-Xanagah  sahəsindəki təqribən 8-10 kilometrlik sahələrində yaşlı qızılağaclara təsadüfi hallarda rast gəlmək olar. Qəzetinizdəki yazıda da çox haqlı olaraq qeyd edildiyi kimi, ötən əsrin sonlarında ölkədə baş verən anarxiya və xaos 16-dan artıq kənd və digər yaşayış məntəqələrini birləşdirən Rustov İƏV-in çaykənarı Qızılağac meşəliklərindən də yan keçmədi. Qızılağac kimi özü bitən, heç bir qulluq tələb etməyən nadir ağaclar, həmin şəxsi təsərrüfatlardakı meyvə ağacları kənd sakinləri tərəfindən doğranılıb yandırıldı.

Ümid edirik ki, indi meşələrin qorunmasında, ekologiyanın bərpa edilməsində Şahdağ Milli Qoruğunun yaradılması, təbii qaz çəkilişinin sürətlə başa çatdırılması müsbət nəticələrini verəcək.

Qızılağac meşəliklərinin vaxtsız və kütləvi qırılması çay sellərinin kənd evlərinə yaxınlaşmasına, həyətlərə daxil olub tikililəri yuyub aparmasına, kənd yollarını doğıtmasına səbəb olur.

Respublikamızın əksər çaylarının sahillərində təbii halda bitmiş Qızılağac və digər nadir ağacların qırılmasının qarşısının alınması və çaylarımızın, Qızılağac meşələrinin, bütünlükdə ekologiyanın qorunması ilə bağlı yazıların mütəmadi dərci zəruridir. Əslində, hamımız  bu istiqamətdə səylərimizi birləşdirməliyik.

Qırımızı Kitaba düşmüş Qızılağac və onun kimi digər nadir ağaclardan ibarət çaykənarı meşəlikləri qoruyub genişləndirə bilərik. Eyni zamanda, ekoturizmi də inkişaf etdirməklə yeni iş yerləri, turizm strukturları yaratmaq olar. Son nəticədə çaykənarı Qızılağac meşəliklərinin əhəmiyyətini dərk edən və adı Qırmızı Kitaba düşmüş Qızılağacı odun kimi kəsib yandıranlar da bir daha belə zərərli hərəkətlərə yol verməzlər.

İnanırıq ki. "Azərbaycan" qəzeti ümumxalq əhəmiyyətli ekoloji maarifləndirmə missiyasını həmişə olduğu kimi, bundan sonra da müvəffəqiyyətlə davam etdirəcəkdir.

Həzrətqulu ƏHMƏDOV,

Quba rayonu, Rustov kənd sakini