Tolerantlığı ilə dünyaya nümunə olan respublikamızda bütün dinlərin nümayəndələri sərbəst və azad şəraitdə öz dini mərasimlərini həyata keçirir, Tanrıya sitayiş edirlər. Ölkəmizdə tolerantlığı ilə seçilən rayonlardan biri də Qubadır. Burada yaşayan digər xalqların yaşam tərzi, həyat şəraitlərinin yaxşılaşması istiqamətində xeyli iş görülüb.

Dağ yəhudilərinin kompakt yaşadığı Qırmızı qəsəbədə də abadlıq-quruculuq işləri davam etdirilir. Burada həyata keçirilən layihələr, sözün həqiqi mənasında, qəsəbənin simasını dəyişdirib. Qəsəbənin Raşbil Zaxaryayev küçəsində dağ yəhudilərinin milli mədəniyyətini, adət-ənənələrini əks etdirən tarix-diyarşünaslıq muzeyi tikilir. Bu muzey həm də sinaqoq kimi fəaliyyət göstərəcək. Qeyd edək ki, muzey-sinaqoq əvvəlki yerində, eyni ilə köhnə binanın üslubunda inşa olunur. Obyektin dam örtüyü və günbəz hissəsi xüsusi ornamentlərlə işlənilib. İnşaat işlərində milli arxitektura gözlənilir: divarları içəridən mişar daşı ilə hörülüb, çöl tərəfi isə yenidən kərpiclə üzlənib.

Qəsəbədə həmçinin mədəniyyət və istirahət parkı da salınıb. Bu parkda aptek, ahıllar evi fəaliyyət göstərəcək. Həmçinin uşaqlar üçün əyləncə mərkəzinin yaradılması, fəvvarənin quraşdırılması nəzərdə tutulub. Hazırda parkın ərazisində yaşıllıq zolağı salınır.   

Qırmızı qəsəbənin yuxarı hissəsindəki 150 illik tarixi olan "Tağlı körpü"nün təmiri də başa çatmaq üzrədir. Körpünün altındakı istinad dayaqları möhkəmləndirilmiş, keçid hissəsində dəmirbeton quraşdırılması işləri də sona çatmışdır. İndi bu qəsəbə həqiqətən də rayonumuzun ən gözəl və müasir qəsəbələrindən biridir.

Qəhrəman QASIMOV,

Quba