Azərbaycan Tibb Universitetinin (ATU) Tələbə Elmi Cəmiyyətinin (TEC) təşkilatçılığı ilə Dövlət Mükafatı laureatı, Əməkdar elm xadimi, professor Tamerlan Əziz oğlu Əliyevin 100 illiyinə həsr olunmuş tibb tələbələrinin və gənc alimlərin beynəlxalq konfransı keçirilib. Onlayn formatda təşkil olunan konfransda Türkiyə, Özbəkistan, Almaniya, Belçikadan olan gənc alimlər, tələbələr, həkimlər, o cümlədən Azərbaycan Tibb Universitetinin və Naxçıvan Dövlət Universitetinin (NDU) müəllim və tələbələri iştirak ediblər.

ATU-nun mətbuat xidmətindən AZƏRTAC-a bildiriblər ki, universitetin elmi işlər üzrə prorektoru, dosent Rauf Bəylərov böyük alimin elmi fəaliyyəti haqda ətraflı məlumat verib. Sonra NDU-nun Tibb fakültəsinin dekanı Elsevər Əsədov, ATU-nun professoru Amaliya Əyubova, Türkiyə Yeditepe Universitetinin ginekologiya kafedrasının müdiri, professor Erkut Ettar çıxış ediblər. Natiqlər professor T.Əliyevin həyatı və elmi fəaliyyətindən, tibb elminə verdiyi töhfələrdən söhbət açıblar.

Konfransda müasir təbabətin aktual problemlərinə həsr olunmuş elmi araşdırmalar dinlənilib.

Almaniyadan Mehdi Əhmədpur, Cəlal Salatayi, Belçikadan professor Halid Topal, Özbəkistandan Sidiq Xocayevin təqdim etdiyi məruzələr iştirakçıların böyük marağına səbəb olub. Həmçinin konfransın yüksək səviyyədə təşkili təqdirəlayiq hesab edilib.

Sonda çıxış edən Tələbə Elmi Cəmiyyətinin sədri, tibb elmləri doktoru Müşfiq Həsənov tədbir iştirakçılarına və konfransın keçirilməsinə şərait yaratdığı üçün universitetin rektoru, professor Gəray Gəraybəyliyə dərin minnətdarlığını bildirib.