02 Oktyabr 2015 03:10
608
Tədbirlər
A- A+

Prezident İlham Əliyev polo idman növü üzrə Azərbaycan yığma komandasının üzvləri ilə görüşüb

Oktyabrın 2-də Azərbaycan Respublikasının Prezidenti İlham Əliyev polo idman növü üzrə Bakıda keçirilən birinci Avropa çempionatının qalibi olmuş Azərbaycan yığma komandasının üzvləri ilə görüşüb.

Görüşdə çıxış edən Prezident İlham ƏLİYEV dedi:

-Keçən ay Bakıda polo üzrə birinci Avropa çempionatı keçirilmişdir. Bizim milli komandamız bütün rəqiblərə qalib gələrək çempion titulunu qazanmışdır. Bu gözəl hadisə münasibətilə sizi, ilk növbədə idmançıları, məşqçiləri, idman mütəxəssislərini, Atçılıq Federasiyasının nümayəndələrini ürəkdən təbrik edirəm. Bu, doğrudan da böyük, gözəl qələbədir.

Avropa çempionatı ilk dəfə keçirilmişdir. Bildiyimə görə, çempionatın keçirilməsinin təşəbbüskarı da Azərbaycan Atçılıq Federasiyası olmuşdur. Çempionat yüksək səviyyədə keçirilmişdir. Yəni, bu da təbidir, çünki Azərbaycanda bütün beynəlxalq idman yarışları ən yüksək səviyyədə keçirilir. Əlbəttə ki, bizim komandamız öz gücünü göstərdi. Bu, bizim növbəti idman qələbəmizdir.

Polo idman növü bizim xalqımıza çox yaxındır, bizim çövkən milli idman oyununa çox oxşayır. Əlbəttə ki, bizim idmançılarımızın təcrübəsi də kifayət qədər böyükdür. Ancaq Avropa çempionatı çox mötəbər idman yarışıdır. Bildiyimə görə, bu çempionatda çox güclü komandalar iştirak etmişlər və mübarizə də çox gərgin idi. Siz xalqımızı, azarkeşləri sevindirdiniz. Bir daha demək istəyirəm ki, Azərbaycan öz idman gücünü göstərib.

Bu vaxta qədər biz dəfələrlə bütün mötəbər yarışlarda ləyaqətlə çıxış etmişik. Müxtəlif idman növləri üzrə bizim dünya, Avropa, Olimpiya çempionlarımız var. Bu idman növündə də Azərbaycan tarixə öz adını yazdı. Çünki birinci çempionat Bakıda keçirildi və birinci qalib də Azərbaycan komandası oldu.

Atçılıq idman növünün inkişafına böyük diqqət göstərilir. Son vaxtlar həm Bakıda, həm bölgələrdə bu idman növünə çox böyük maraq var. Şadam ki, çövkən üzrə respublika çempionatları mütəmadi qaydada keçirilir və bu çempionatlarda iştirak edən komandaların sayı artır. Yəni, bu, çox böyük maraq doğuran idman növünə çevrilibdir. Həm böyük tamaşaçı auditoriyası cəlb edir, həm də artıq bizim böyük idman ordumuz var.

Bu idman növü ilə məşğul olan gənclər öz gücünü göstərirlər. Bütün başqa lazım olan şərait də yaradılıb. Son illər ərzində həm Bakıda, həm də bölgələrdə bu sahəyə çox böyük diqqət göstərilir.

Bütövlükdə idman Azərbaycanda prioritet istiqamətdir. Bizim idmançılarımız xalqımızı mötəbər yarışlarda sevindirir. Xüsusilə, birinci Avropa Oyunlarında Azərbaycan milli komandası ikinci yerə layiq görülmüşdür. Bu da hesab edirəm ki, Azərbaycan idmanının təntənəsi idi. Həm təşkilatçılıq məsələləri, həm idmançılar, qonaqlar üçün təşkil edilmiş mədəni proqram ən yüksək səviyyədə həll olunmuşdur. Əlbəttə ki, Azərbaycan vətəndaşları bütün yarışlarda bizim idmançılarımızı çox böyük sevgi, məhəbbətlə dəstəkləmişlər və bu dəstək əminəm ki, bizim idmançılarımıza əlavə güc veribdir.

Bütün Avropa ölkələri arasında ikinci yeri tutmaq tarixi qələbədir. Bu, ölkəmizin, xalqımızın, müstəqil Azərbaycanın qələbəsidir. Bildiyiniz kimi, iki ildən sonra İslam Həmrəylik Oyunları keçiriləcəkdir. Azərbaycan yenə də tarixə öz adını yazacaq ki, birinci ölkədir həm Avropa, həm İslam Oyunları bu ölkədə keçirilir. Yenə də əminəm ki, bu, növbəti idman bayramına çevriləcəkdir. İndi hazırlıq işləri gedir və əminəm ki, İslam Həmrəylik Oyunları Avropa Oyunlarının, yəni, Yay Olimpiya Oyunlarının səviyyəsində keçiriləcəkdir. Çünki biz bu məqsədi qarşıya qoymuşduq, bu məqsədə də nail ola bildik. Gələn il biz yenə də tamaşaçıları sevindirəcəyik, Azərbaycanda gözəl, mötəbər, dünya miqyaslı yarışlar keçiriləcək.

Azərbaycan artıq dünyada idman ölkəsi kimi özünü təqdim edə bilib və idmançılarımız bizi çox sevindirirlər. Bütün bölgələrdə idmanla məşğul olmaq üçün gözəl şərait - olimpiya-idman kompleksləri, idman meydançaları var. Gənclər idmana çox meyillidirlər. Bu da gəncləri sağlam ruhda və fiziki cəhətdən sağlam şəraitdə böyüdəcəkdir, yaxşı tərbiyə alacaqlar. İdmanla məşğul olanların böyük əksəriyyəti məişətdə də nümunə olur. Biz idmançılarımızla fəxr edə bilərik. İdmanla məşğul olan insan həm fiziki cəhətdən, həm mənəvi cəhətdən sağlam, dəyərli vətəndaş olur. Mən də çox istəyirəm ki, bizim gənclərimiz güclü, fiziki, mənəvi cəhətdən hazırlıqlı, Vətənə bağlı, vətənpərvər olsunlar. Vətənpərvərlik hisslərini idman qədər gücləndirən ikinci amil bəlkə də çətin ki, tapılsın. Yəni, idman bütün cəmiyyəti birləşdirir və əlbəttə ki, qələbə qazanılanda bütün xalq buna sevinir. İdman yarışları o mübarizə, o rəqabət formasıdır ki, burada nəticələr göz qabağındadır. Ölkələrin müxtəlif inkişaf dinamikaları var. Ancaq Olimpiya Oyunlarında, dünya çempionatlarında hər şey açıq-aydın görünür: kim birinci yerdədir, kim ikinci yerdədir. İdmanın inkişafı hər bir ölkənin ümumi inkişafını göstərir. Ona görə, dünya, Avropa çempionatlarının, Olimpiya Oyunlarının nəticələrinə fikir versək görərik ki, birinci yerlərdə adətən inkişaf etmiş ölkələr qərarlaşır. Azərbaycan bu ölkələrin arasındadır.

Mən bir daha sizi ürəkdən təbrik edirəm, sizə yeni uğurlar arzulayıram. Bundan sonra bu titulu saxlamaq asan olmayacaq, çünki sizinlə yarışacaq bütün komandalar bu yarışlara xüsusi bir həvəslə çıxacaqlar. Ona görə, siz çalışmalısınız ki, gələcək yarışlarda da Azərbaycanın idman şöhrətini həmişə uca tutasınız. Bir daha təbrik edirəm.

 

x x x

 

Komandanın üzvü Elçin CAMALLI çıxış edərək dedi:

-Möhtərəm cənab Prezident, əvvəlcə Azərbaycan atçılığının inkişafına göstərdiyiniz ali diqqət və qayğıya görə bütün çaparlar adından Sizə dərin minnətdarlığımızı bildiririk. Sizin diqqət və qayğınızın nəticəsidir ki, artıq Azərbaycanda digər idman növləri ilə yanaşı, atçılığın polo növü üzrə də qızıl medallar əldə edilib. Sizin qəbulunuzda olmaq hər bir vətəndaş kimi bizim üçün də çox böyük qürur və fəxarət hissidir.

Son illər ərzində Azərbaycanda atçılıq idmanının bütün növləri üzrə mühüm işlər görülmüşdür. Yüksək səviyyədə beynəlxalq turnirlər keçirilmişdir. Mükəmməl at cinslərimiz yetişdirilmişdir. Qədim oyunlarımız Sizin sayənizdə daha da inkişaf etmişdir. Azərbaycan milli komandasının üzvü olmaq hər bir idmançı kimi bizim üçün də çox məsuliyyətli işdir. Çünki Sizin idmançılara, idmana olan etimadınızı doğrultmalıyıq.

Ölkəmizdə Avropa çempionatı keçirildi və biz bu çempionatda qalib olduq. Bu qələbəmizi Sizə və qüdrətli Azərbaycan xalqına həsr edirik. Çox sağ olun.

 

x x x

 

Qazanılan uğurda komanda üçün yaradılmış şəraitin mühüm rol oynadığını qeyd edən Azərbaycan Respublikası Atçılıq Federasiyasının prezidenti Elçin QULİYEV dedi:

-Möhtərəm cənab Prezident, icazə verin, bir daha göstərdiyiniz bu ali diqqətə, qayğıya görə Sizə Azərbaycanın bütün atçılıq idmansevərləri adından dərin minnətdarlığımızı, hörmət və ehtiramımızı bildirim.

Sözsüz, göstərdiyiniz bu dəstəyin nəticəsidir ki, Azərbaycan idmançıları dünya meydanlarında, beynəlxalq yarışlarda ardıcıl olaraq yüksək nəticələr əldə edirlər. Əgər əvvəllər idmançılarımız yalnız Azərbaycan üçün ənənəvi idman növlərində nəticələr əldə edirdilərsə, bu gün artıq bu idman növləri şaxələnməkdədir və digər idman növləri üzrə də Azərbaycan idmançıları yüksək nəticələr əldə edirlər.

Azərbaycanın polo üzrə yığma komandasının Avropa çempionatında əldə etdiyi nəticə də məhz belə qələbələrdəndir. Mən çox şadam ki, biz bu qələbəni, bu yüksək nəticəni əldə etdik. İdmançımızın iftixar hissi ilə dediyi kimi, bu qələbəni Sizin rəhbərliyiniz altında qüdrətli Azərbaycana həsr etdik. Bir daha dərin minnətdarlığımızı bildiririk, cənab Prezident. Göstərdiyiniz bütün diqqətə, qayğıya görə çox sağ olun.

 

x x x

 

Sonra Prezident İlham Əliyevə xatirə hədiyyələri təqdim olundu.

 

x x x

 

Prezident İlham Əliyev əldə olunmuş nailiyyətdə komandanın məşqçisinin xidmətlərini xüsusi qeyd etdi.

Polo üzrə milli komandamızın məşqçisi Silvester QARROS Azərbaycana gəldiyi gündən Bakıda gördüklərindən məmnunluğunu ifadə etdi. O, ölkəmizdə idmanın inkişafı üçün görülən nəhəng işlərin nəticəsi olaraq Azərbaycan idmançılarının müxtəlif beynəlxalq yarışlarda, o cümlədən olimpiadalarda əldə etdiyi nailiyyətlərin dünya idman ictimaiyyətində yaratdığı təəssüratlardan danışdı.

Bakıda keçirilən birinci Avropa Oyunlarına toxunan Silvester Qarros bu Oyunların möhtəşəm idman bayramı kimi təkcə Avropanın deyil, bütün dünyanın idman tarixinə ən yaddaqalan hadisə kimi düşdüyünü vurğuladı. O, polonun Azərbaycanın milli çövkən oyununa çox oxşar olduğunu və idmanın bu növünün inkişafı üçün yaradılan şəraiti və potensialı heç bir başqa ölkədə müşahidə etmədiyini bildirdi və bütün bunlara görə Prezident İlham Əliyevə minnətdarlıq etdi.

Sonda xatirə şəkli çəkdirildi.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video