27 Oktyabr 2021 22:25
1163
PARLAMENT
A- A+

Özbəkistan Azərbaycanın iqtisadi inkişaf modelini, əməkdaşlıq imkanlarını öyrənməkdə maraqlıdır

 

Oktyabrın 27-də Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili ölkəmizdə səfərdə olan Özbəkistan Respublikası Prezidenti Administrasiyası yanında İqtisadi Təhlil və İslahatlar Mərkəzinin rəhbəri Obid Hakimovun başçılıq etdiyi nümayəndə heyəti ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, komitə sədri oktyabrın 24-də Özbəkistanda prezident seçkilərinin uğurla keçməsi və Şavkat Mirziyoyevin yenidən dövlət başçısı seçilməsi münasibətilə nümayəndə heyətinə təbriklərini çatdırıb.

İki ölkə arasındakı münasibətlərdən danışan Tahir Mirkişili dövlət başçılarının yüksək səviyyəli münasibətlərinin ikitərəfli əməkdaşlığımızda mühüm əhəmiyyət kəsb etdiyini vurğulayıb.

Qlobal reytinq cədvəllərində Azərbaycanın dünyada ən islahatçı ölkə kimi tanındığını deyən komitə sədri ölkə iqtisadiyyatının inkişafı, investisiya və biznes mühitinin daha da yaxşılaşdırılması ilə bağlı Azərbaycanda aparılan davamlı islahatlardan və bu istiqamətdə Altıncı çağırış Milli Məclisin qarşısında duran çağırışlardan söz açıb.

O, Vətən müharibəsində Azərbaycanın Ermənistanın işğalına son qoyaraq əldə etdiyi Zəfərin regionda yaratdığı əməkdaşlıq imkanları barədə məlumat verib, azad edilmiş ərazilərdə görülən genişmiqyaslı quruculuq, kommunikasiyaların bərpası işlərindən bəhs edib, Özbəkistanın bu işlərdə iştirakı ilə bağlı fikirlərini səsləndirib.

Özbəkistan Respublikası Prezident Administrasiyası yanında İqtisadi Təhlil və İslahatlar Mərkəzinin direktoru Obid Hakimov təmsil etdiyi qurum haqqında məlumat verib, Özbəkistanın qarşısına qoyduğu iqtisadi inkişaf hədəfləri barədə danışıb. Ölkədə islahatların ikinci mərhələsinə hazırlaşdıqlarını bildirən qonaq səfərlərinin məqsədinin Azərbaycanın iqtisadi inkişaf modelinin, əməkdaşlıq imkanlarının yaxından öyrənilməsi olduğunu qeyd edib.

Görüşdə iştirak edən Milli Məclisin İqtisadi siyasət, sənaye və sahibkarlıq komitəsinin sədr müavini Əli Məsimli, komitə üzvləri deputat Rüfət Quliyev, Elnur Allahverdiyev və Məzahir Əfəndiyev qarşılıqlı ticarət dövriyyəsinin artırılması, iqtisadiyyatın müxtəlif sahələrində, xüsusən kənd təsərrüfatında əməkdaşlıq, işğaldan azad edilmiş ərazilərdə həyata keçirilən layihələrdə birgə fəaliyyət və digər məsələlər barədə fikirlərini açıqlayıblar.

Görüşdə tərəfləri maraqlandıran digər məsələlər barədə də fikir mübadiləsi aparılıb.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video