Pensiya yaşım çatıb. Bilmək istərdim ki, hərbi xidmətdə olduğum 2 il və ali məktəbdə təhsil aldığım 5 il ümumi əmək stajıma daxil ediləcəkmi? Ümumiyyətlə, pensiya hesablanarkən hansı amillər nəzərə alınır?

Nizami Həbibov,

Bakı şəhəri

- Sığorta stajına daxil edilən iş və ya digər fəaliyyət müddətləri "Əmək pensiyaları haqqında" qanunun 21-ci maddəsində nəzərdə tutulmuşdur. Qanunun 21.2.3-cü maddəsinə görə, müddətli həqiqi hərbi (alternativ) xidmət (1992-ci il yanvarın 1-dək keçmiş SSRİ-nin ərazisində müddətli həqiqi hərbi xidmət dövrü daxil olmaqla) sığortaolunanın sığorta stajına daxil olunur. Lakin sığortaolunanın ali məktəbdə təhsil aldığı müddətin onun sığorta stajına daxil edilməsi sözügedən qanunda nəzərdə tutulmamışdır. Müqayisə üçün qeyd edək ki, qüvvədən düşmüş "Vətəndaşların pensiya təminatı haqqında" qanunun 67-ci maddəsinin "ğ" bəndində ali, orta ixtisas, texniki peşə məktəblərini bitirmiş şəxslərin təhsil müddətinin iş stajına daxil edilməsi təsbit olunmuşdu.

Yaşa görə əmək pensiyası baza, sığorta və yığım hissələrindən ibarətdir. Yaşa görə əmək pensiyasının baza hissəsinin məbləği müvafiq icra hakimiyyəti orqanı (Azərbaycan Respublikasının Prezidenti) tərəfindən müəyyən edilir. Yaşa görə əmək pensiyasının sığorta və yığım hissələrinin məbləğləri isə "Əmək pensiyaları haqqında" qanunun 10.2 və 10.3-cü maddələrində nəzərdə tutulmuş düsturlara uyğun olaraq müəyyənləşdirilir.

Cavablandırdı:

Dünyamin NOVRUZOV,

Bakı Hüquq Mərkəzinin hüquq məsləhətçisi