Özüməməxsus məhəllədə sənədləşdirilmiş qaydada 76 kv.m-lik mağaza tikdirmişəm. Bilmək istəyirəm ki, mağazanın tullantılarının daşınmasına görə nə qədər haqq ödəməliyəm?

 

Fərhad Əliyev,

Ağstafa şəhəri

 

- Azərbaycan Respublikasının Tarif (Q

iymət) Şurasının "Bərk məişət tullantılarının yığılması, daşınması və zərərsizləşdirilməsi xidmətlərinin tariflərinin tənzimlənməsi barədə" 24 noyabr 2011-ci il tarixli 5 nömrəli qərarının 1-ci bəndinə əsasən, bərk məişət tullantılarının yığılması və daşınması xidmətinin tarifi qeyri-əhali qrupu üzrə tullantının

1 m3 üçün 10 manat təşkil edir.

Azərbaycan Respublikasının Tarif (Qiymət) Şurasının sözügedən qərarının 2-ci bəndi ilə mülki qanunvericiliyə uyğun olaraq, xidmət göstərən subyektlərlə istehlakçılar arasında xidmətlərin müqavilə əsasında həyata keçirilməsinin təmin edilməsi qərara alınmışdır.

Beləliklə, mağazanızın tullantılarının daşınması üçün bu sahədə xidmət göstərən şəxslə müqavilə bağlamalı və ödənişi göstərdiyi xidmət müqabilində həyata keçirməlisiniz.

 

Məhkəmənin qətnaməsi ilə əməkhaqqımın 1/4 hissəsi məbləğində aliment tutulması qət edilmişdir. Aliment əməkhaqqımın ümumi məbləğindən, yoxsa vergi çıxıldıqdan sonra qalan məbləğdən hesablanacaqdır?

 

Səməd Hacızadə,

Sumqayıt şəhəri

 

- Azərbaycan Respublikasının Nazirlər Kabinetinin 98 nömrəli, 23 may 2001-ci il tarixli qərarı ilə təsdiq olunmuş "Uşaqlar üçün valideynlərinin aliment tutulan, manat və xarici valyuta ilə aldıqları əməkhaqqının və (və ya) başqa gəlirlərinin növləri"nin 7-ci bəndinə görə, aliment onu ödəyən şəxsə çatası qazancın (gəlirin) məbləğindən vergilər tutulduqdan sonra alınır.

 

Cavablandırdı:

Dünyamin NOVRUZOV,

Bakı Hüquq Mərkəzinin hüquq məsləhətçisi