Futbolçularımız da qələbəyə inanırlar

Dünən "Aeroport" hotelində Avro-2012-nin seçmə mərhələsi çərçivəsində Qazaxıstan millisi ilə qarşılaşacaq futbol üzrə yığmamızın məşqçisi Olaf Yansenin və futbolçuların iştirakı ilə oyunöncəsi mətbuat konfransı keçirilmişdir. Bu dəfə də səhhətindəki problemi əsas gətirərək tədbirə qatılmayan baş məşqçi Berti Foqtsu  əvəz edən köməkçisi Olaf Yansen rəqibin çox güclü heyətə malik olduğunu demişdir: "Qazaxıstanla sabahkı matçda bizə asan olmayacaq. Komandamızı çətin sınaq gözləyir. Qazaxıstan yığması seçmə mərhələnin əvvəlindəki komanda deyil, xeyli güclüdür. Avstriyaya son dəqiqələrdə uduzan komandanı Türkiyə ilə oyunda da gördüm. Onlar uzatma dəqiqələrində qol vurub Türkiyəni də məğlub edə bilərdilər. Güclü müdafiə xətləri və Ostapenko, Qridin kimi hücumçuları var. Amma biz istənilən halda əlimizdən gələni edəcəyik ki, qarşıdakı oyunda qələbə qazanıb azarkeşlərimizi sevindirək". O, bu qələbəni nəyin sayəsində qazanmağın mümkünlüyünü də izah etdi: "Oyunçularımızın sürətli, cəld hərəkətləri, rəqibi daim təzyiqdə saxlaması sayəsində bunlara nail olmaq mümkündür. Bütün oyun boyu rəqibə göz açmağa imkan verməməliyik".

Daha sonra milli komandamızın futbolçuları Qazaxıstan matçı ilə bağlı fikirlərini bildirdilər.

Əfran İsmayılov, yarımmüdafiəçi: "Bəli, mən Belçika ilə oyunda zəif oynadım. Amma biz çox güclü rəqibə qarşı müdafiədən oynamaq məcburiyyətində qalmışdıq. Qazaxıstana qarşı isə hücum futbolu oynamalı olacağıq. Belə halda, təbii ki, mənim də daha yaxşı oyun sərgiləmək şansım var. Mən bu matçı karyeramda ən vacib oyun adlandırardım".

Rauf Əliyev, hücumçu: "Qoy azarkeşlər bizə inansınlar. Onları sevindirəcəyimizə söz veririk. Qazaxıstanla oyunda dolu tribunalar görmək istəyirik. Ümid edirəm ki, bu dəfə azarkeşlər Belçika ilə oyundakından daha çox olacaq. Fikrimcə, Belçika ilə oyundan sonra fiziki cəhətdən tam bərpa olmuşuq. Bu baxımdan problemlə üzləşəcəyimizi düşünmürəm. Qazaxıstan millisini mütləq məğlub etməliyik".

Aqil Nəbiyev, müdafiəçi: "Hələ məlum deyil ki, oynayacağam, ya yox. Həkimlər sabah dəqiq söz deməlidirlər. Hələ də fizioterapevt yardımına ehtiyac duyuram. Belçika ilə oyuna gəlincə, həmin matçda yaxşı oynadım. Amma istəməzdim ki, məni komanda yoldaşlarımdan fərqləndirsinlər. Mənim əsas məqsədim həmişə yığmada uğurla çıxış etmək və daimi olaraq dəvət almaqdır. Qarşıda bizi Qazaxıstanla mühüm oyun gözləyir. Hamı bizdən yaxşı oyun istəyir. Bu oyuna hazırıq. Rəqib üzərində qələbə qazanmağa da hazır olduğumuzu düşünürəm".

Xatırladaq ki, Azərbaycan- Qazaxıstan matçı Bakı vaxtilə bu gün saat 20.00-da Tofiq Bəhramov adına Respublika stadionunda keçiriləcək.