Bakı şəhəri Xətai rayonu Cavanşir küçəsindəki 25 nömrəli binada yaşayırıq. Bura 1979-1980-ci illərdə köçmüşük. O vaxtdan qonşuların da iştirakı ilə binanın ətrafının yaşıllaşdırılmasına çalışmışıq.

Buna nail olmuşuq da. Ağaclar artıq kifayət qədər böyüyüb. Ancaq bir neçəsi küləyin təsiri ilə aşıb, bəziləri quruyub.

Ağacların hazırda təhlükəli vəziyyətdə olduğunu nəzərə alaraq bu ilin əvvəlində Azərbaycan Respublikası Ekologiya və Təbii Sərvətlər Nazirliyinin Dövlət Ekspertiza İdarəsinə müraciət etdik. Həmin idarənin əməkdaşları məktuba operativ reaksiya verdilər və oradan gələn nümayəndə hansı ağacların kəsilməsi, hansıların budanıb təhlükəsiz vəziyyətə gətirilməsi ilə bağlı müvafiq qeydlər apardı. 5 mart 2014-cü il tarixində hazırlanmış rəy (surəti əlavə olunub) Bakı şəhəri İcra Hakimiyyəti Yaşıllaşdırma İdarəsinə və bizə göndərildi. Sevindik ki, yaxın günlərdə xahişimiz yerinə yetiriləcək. Ancaq belə olmadı. Səkkiz aydır rəyin icrası təmin olunmayıb. Əlaqə nömrəsinə zənglərimizə də ancaq bir cavab alırıq: “Müdirə çatdırarıq...”

Hörmətli redaksiya, xahiş edirik ki, bizim xahişimizi müdirə siz də çatdırasınız. Bəlkə, insafa gəlib, nəhayət, verilən rəyə əsasən müvafiq tədbir görərlər. Çünki “dövlət idarəsinin verdiyi rəyin icrasının müddəti 1 ilə qədərdir”. Yəni yaxın 2 ay müddətində rəy icra olunmadığı təqdirdə biz bu proseduru bir daha keçməli, yenidən rəy almalı olacağıq.

Həsən VƏLİYEV,

Xanlar MƏMMƏDOV,

Oqtay CARÇIYEV,

cəmi: 13 imza