İnformasiyanın toplanması və uzun müddət ərzində  saxlanması üçün  vasitələrin təkmilləşdirilməsi  istiqamətində axtarışlar davam etməkdədir. Belə ki, elm və texnikanın sürətli inkişafı fonunda məlumat bazalarının uzun müddət qorunmasına imkan verən texnologiya mövcud deyil.

Fransalı alimlər konkret məqsəd naminə ən azı milyon il keyfiyyətini itirməyəcək bərk disk yaratmaq fikrini reallaşdırmaq üzrədirlər. Layihə Fransanın radioaktiv tullantıların basdırılması ilə məşğul olan "Andra" agentliyinin sifarişi ilə həyata keçirilir. Niyyət radioaktiv tullantılar  basdırılmış  ərazilər haqqında məlumatı gələcək nəsillərə ötürmək üçün uzunmüddətli istifadəyə yararlı disk yaratmaqdır. İlk prototip artıq hazırdır. Yaqutdan düzəldilmiş  iki laydan (plastindən) ibarət  diskin diametri 20 santimetrdir. Xatırladaq ki, yaqut yüksək davamlılığı ilə seçilən qiymətli daşdır - mineraloji  12 ballıq cədvəl üzrə 9-cu dərəcəyə aiddir. İnformasiya plastinin üzərinə platin alət vasitəsilə oyma üsulu ilə həkk edilir və daha sonra hər iki plastin molekulyar əsasda birləşdirilir. Disk-prototip 25 min avroya başa gəlib.

Layihə müəlliflərinin bildirdiyinə görə, bir belə diskdə 40 min səhifə məlumat saxlamaq mümkündür. Diskdəki informasiyanı oxumaq üçünsə mikroskopdan istifadə olunmalıdır. Bu məlumat daşıyıcısı laboratoriya şəraitində testdən də keçirilib. Modelləşdirmə yolu ilə diskin dözümlük müddəti hesablanıb. Alimlər yaqut diskin 10 milyon ilə qədər "yaşaya" biləcəyini iddia edirlər.

Diskin hazırlanmasında iştirak edən işçi qrupun tərkibinə mühəndislərlə yanaşı, antropoloqlar, arxeoloqlar, rəssamlar, arxivçilər və linqvistlər də daxildir.