Noyabrın 18-də Azərbaycan Respublikasının Milli Məclisində Avropa İttifaqının maliyyələşdirdiyi "Uşaqların Xilası" (Save the Children) beynəlxalq təşkilatı ilə birgə "Milli Qanunvericilikdə Uşaq hüquqları: reallıqlar və perspektivlər" mövzusunda "dəyirmi masa" keçirilmişdir.

Parlamentin Sosial siyasət komitəsinin sədri Hadi Rəcəbli demişdir ki, ictimai müzakirə əlamətdar bir dövrə - BMT-nin uşaq  hüquqları ilə bağlı xüsusi konvensiyasının ildönümünə təsadüf  etmişdir. H.Rəcəbli Milli Məclisdə uşaq hüquqları ilə bağlı qəbul edilmiş qanun və qərarlar barədə geniş məlumat vermişdir. Qeyd olunmuşdur ki, "dəyirmi masa"nın təşkili ölkəmizdə uşaq və gənclərin hüquqlarının müdafiəsinin, sosial-iqtisadi inkişafının daha  da təkmilləşdirilməsinə xidmət edir. 

"Uşaqların Xilası" (Save the Children) təşkilatının Azərbaycan  və Gürcüstan üzrə direktoru Lesile Vilson demişdir ki, 90  il əvvəl yaranan qurum məhz uşaqların hüquqlarının müdafiəsi sahəsində  qanunvericilikdə mövcud olan boşluqların aradan qaldırılması məqsədi daşıyır. Təşkilat rəhbəri fəaliyyətlərinin daha da genişləndirilməsi sahəsində görülən işlər barədə danışmışdır.  Bildirilmişdir ki, Azərbaycan parlamentində keçirilən bu tədbir uşaq və gənclərin peşə hazırlığının artırılmasına, onların həyat bacarıqlarının inkişaf etdirilməsinə, yaşadıqları müvəqqəti yaşayış müəssisələrini tərk etdikdən sonra müstəqil fəaliyyət sahəsində mövcud problemlərinin aradan qaldırılmasına yardım göstərəcəkdir.

Sonra tədbirdə çıxış edən Milli Məclisin deputatı, "Lider qadınlar" İctimai Birliyinin sədri Məlahət İbrahimqızı ölkəmizdə  cəmiyyətin həssas təbəqəsi olan uşaqlara göstərilən dövlət    qayğısından danışmışdır. O, Heydər Əliyev Fondunun bu sahədəki əvəzsiz xidmətlərini, Fondun prezidenti, Milli Məclisin deputatı  Mehriban xanım Əliyevanın uşaqlara göstərdiyi diqqət və qayğını xüsusi qeyd etmişdir.

"Dəyirmi masa"da iştirak edən gənclər və idman nazirinin müavini İntiqam Babayev, deputatlar Sədaqət Vəliyeva, Sevinc  Hüseynova, Rauf Əliyev, beynəlxalq təşkilatların və QHT-lərin nümayəndələri bu sahədə əldə olunan nailiyyətlərdən danışmış, beynəlxalq təcrübə barədə fikirlərini bölüşmüş, rəy və təkliflərini səsləndirmişlər.