Lerik dağlıq ərazidə yerləşən aqrar rayondur. Onun ümumi ərazisi 108 min 360 hektardır. Bunun 55 min 896 hektarı kənd təsərrüfatına yararlı torpaqlardır. Həmin torpaqların 13 min 645 hektarı əkinə yararlı, 382 hektarı çoxillik bitkilər altında, 3 min 463 hektarı biçənək, 38 min 406 hektarı örüş sahəsidir.

Torpaq islahatı ilə bağlı keçmiş kolxoz və sovxozlara məxsus olan 11 min 366 hektar əkinə yararlı torpaq sahəsi isə vətəndaşların xüsusi mülkiyyətinə verilmişdir. Rayon üzrə həmçinin 40 min 306 hektar dövlət meşə fondu və 4 min 950 hektar yay otlaq sahəsi vardır.

İndi də cari mövsümdə aqrar sektorun əsas sahələri üzrə əldə olunan nəticələr barədə. 2021-ci ilin məhsulu üçün əkilmiş 3 min 10 hektar payızlıq və yazlıq taxıl sahəsində 6 min 908,3 ton məhsul istehsal edilmişdir. Hər hektardan orta məhsuldarlıq 22,9 sentner olmuşdur. O cümlədən 2 min 720,5 hektardan 6 min 344,6 ton (məhsuldarlıq 23,3 sentner) buğda, 136,5 hektardan 273 ton (məhsuldarlıq 20 sentner) arpa, 153 hektardan 290,7 ton (məhsuldarlıq 19 sentner) çovdar biçilmişdir. 177 hektarda isə dənli-paxlalı bitkilər əkilmişdir. Həmin sahələrdən 145,5 hektarının məhsulu yığılmış, 232,8 ton məhsul istehsal edilmiş, məhsuldarlıq 16 sentner olmuşdur.

Onu da qeyd edək ki, taxıl biçinində 4 ədəd müasir “New Holland” dağ kombaynından istifadə olunmuşdur. Taxıl biçini ötən illə müqayisədə 10 gün tez başa çatdırılmış, məhsul itkisiz yığılmışdır.

Rayon üzrə cari mövsüm həmçinin 343,5 hektar sahədə tərəvəz bitkiləri əkilmişdir. İndiyəcən 2 min 256 ton soğan, 558,8 ton sarımsaq, 39 ton pomidor, 51,2 ton xiyar, 71,8 ton kələm, 6 min 847,4 ton kartof və s. istehsal olunmuşdur.

Heyvandarlıqda da vəziyyət yaxşıdır. Heyvanların cins tərkibini dəyişmək, bu yolla məhsuldarlığı artırmaq üçün rayonumuzda ayrı-ayrı vətəndaşlar lizinq yolu ilə 62 baş heyvan almışlar. Süni mayalanma yolu ilə heyvanların cins tərkibinin yaxşılaşdırılması istiqamətində də işlər davam edir. Rayon üzrə bu ilin 6 ayında 562 baş qaramalda süni mayalanma aparılmış, 202 baş buzov alınmışdır.

Lerik təbii balı ilə də məşhurdur. Təsərrüfatlarımızda 20 minə yaxın arı ailəsi bəslənilir. İl ərzində rayon üzrə 150 tondan çox bal istehsal edilir. Söz düşmüşkən onu da bildirək ki, arıçılığın inkişafı üçün rayon icra hakimiyyəti ölkədə fəaliyyət göstərən Sosial-İqtisadi İnkişaf Fəaliyyəti təşkilatı ilə birgə Piran kəndində balqablaşdırma sexinin tikintisinə nail olmuşdur.

Habil MƏLİKOV,

Lerik İcra Hakimiyyəti başçısının müavini