Dekabrın 28-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının (MŞ) növbəti iclası keçirilmişdir.

Şuradan AzərTAc-a bildirmişlər ki, iclası açan Şuranın sədri Umud Mirzəyev iclasın gündəliyindəki məsələlərdən danışmışdır.

Fondun icraçı direktoru Vüqar Səfərli əvvəlcə Dünya Azərbaycanlılarının Həmrəylik Günü və Yeni il münasibətilə noyabrın

19-dan dekabrın 20-dək keçirilmiş fərdi jurnalist yazıları müsabiqəsinin nəticələri barədə məlumat vermişdir. Müsabiqənin KİV-lərin İnkişafına Dövlət Dəstəyi Konsepsiyasında nəzərdə tutulmuş 10 istiqamət üzrə keçirildiyini xatırladan V.Səfərli fonda 76 yazının təqdim olunduğunu, onların 9 ekspert tərəfindən qiymətləndirildiyini bildirmişdir.

Sonra müsabiqənin nəticələri müzakirə edilmişdir. Müsabiqənin şərtlərinə əsasən, hər istiqamət üzrə ən yüksək bal toplamış iki yazı qalib hesab edilmişdir.

Gündəlikdə dayanan ikinci məsələ barədə məlumat verən V.Səfərli fondun Nərimanov Rayon İcra Hakimiyyəti ilə 2011-ci il noyabrın 29-dan dekabrın 24-dək keçirdiyi müsabiqəyə 25 yazının təqdim olunduğunu bildirmişdir. Yazılar üç ekspert tərəfindən müəyyənləşdirilmişdir. Qiymətləndirilən yazılar MŞ-nin müzakirəsinə təqdim edilmişdir. Müsabiqənin şərtlərinə əsasən, birinci yer üzrə 1, ikinci yer üzrə 2, üçüncü yer üzrə 3 qalib müəyyənləşdirilmiş, 5 nəfərə isə həvəsləndirici mükafatın verilməsi barədə qərar qəbul olunmuşdur.

Müşahidə Şurasının üzvləri hər iki müsabiqənin nəticələrini yekdilliklə təsdiq etmişlər.

Müsabiqənin qalibləri dekabrın 29-da mükafatlandırılacaqlar.