04 Avqust 2017 01:08
908
Oxucu məktubları
A- A+

Kitabı sevin və sevdirin...

 

Hər ilin yay aylarında Qusarda kitab bayramı keçirilir. Sayca doqquzuncu olan builki bayramda minlərlə kitabsevər iştirak etdi. Mən də onların arasında idim.

Ali təhsilim olmasa da, uşaqlıqdan kitaba bağlanmışam. Rayon yerində axşamlar, əsasən də qışda  kitab oxumaq insana ruh yüksəkliyi gətirir.

Düzdür, internet əsridir, kompüter və ya mobil elektron cihazlar vasitəsilə haradan istəsən, məlumat toplamaq, nə haqqında desən, informasiya almaq mümkündür. Bununla belə, N.Nərimanov adına istirahət parkında keçirilən növbəti kitab bayramında da  minlərlə insan iştirak edirdi. Bircə diqqəti çəkən onların arasında  gənclərin sayının nisbətən az olması idi. Amma uşaq və yeniyetmələr  çox idi.  Valideynlərin uşaqlarını bu bayrama gətirməsi onların övladlarında  mütaliəyə maraq yaratmaq istəyindən xəbər verirdi. Bu da, əlbəttə, təqdirəlayiqdir.

Tədbirdə müxtəlif mövzularda 3 mindən çox kitab nümayiş edildi. Kitab bayramının təşkilində məqsəd mütaliəyə marağı artırmaqdır. Bu baxımdan elə tədbir zamanı 100-ə yaxın rayon sakininin  kitabxanaya üzv yazılması əlamətdar haldır.

Bir də üzümü valideynlərə tutub demək istəyirəm ki, yay - istirahət, tətil aylarında uşaqların kitab oxumasına nail olun. Özü də bunu düşünülmüş, planlı  şəkildə edin. Nəzərə alın ki, mütaliə uşaqların söz ehtiyatının artmasında, bədii təxəyyüllərinin,  zövqlərinin, o cümlədən dünyagörüşlərinin  yüksəlməsində müstəsna əhəmiyyətə, təsirə malikdir. Kitab oxumayan, söz ehtiyatı kasad insanlar hiss və düşüncələrini belə düzgün və dolğun izhar etməkdə çətinlik çəkirlər. Odur ki, kitabı həm sevin, həm də başqalarına, xüsusən də uşaqlara  sevdirin.

 

Dilarə ŞAXVERDİYEVA,

Qusar

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video