Doğrusu, yaşadığımız ərazidə kənd yollarının yaxın vaxtlarda abadlaşmasına inamımız azalmışdı. Amma Azərbaycan Prezidenti cənab İlham Əliyevin bu ilin aprel ayında Astaraya səfərindən sonra vəziyyət dəyişdi, kənd yollarının yenidən qurulmasına sərəncam verildi. Ən qısa müddətdə bərbad vəziyyətdə olan yolların çoxu abadlaşdırıldı, yenidənqurma işlərinə başlanıldı.

Astara-Bala Şahağac yolunun açılışında iştirak edən dövlət başçısı demişdir: "Baxmayaraq ki, bu, kənd yoludur, gözəldir. Bütün beynəlxalq standartlara cavab verir. İndi bütün kənd yollarımız bu səviyyədə olmalıdır". Belə təpərli və dəyərli qiymətdən sonra Astaranın digər kənd yollarında da ciddi abadlıq işlərinə başlanmışdır. Bir neçə gün ərzində 3,8 kilometr məsafəni əhatə edən Kijəbə-Ojəkəran və 3,5 kilometr məsafəni birləşdirən Kijəbə-Qaçimardə yolunda abadlıq işləri başa çatmışdır. Hazırda minlərlə kənd sakini bu yolun xidmətindən faydalanmaqla ölkə rəhbərliyinə minnətdarlığını bildirir. Biz inanırıq ki, yaxın vaxtlarda rayonumuzun ən ucqar dağ kəndlərində də müasir tələblərə cavab verən yollar çəkiləcək. Bunun üçün imkan da var, şərait də. Azərbaycan Prezidenti cənab İlham Əliyevin bölgələrə səfəri regionların inkişafı çərçivəsində nəzərdə tutulan işlərin daha sürətlə yerinə yetirilməsinə təkan verir. Ona görə də biz cənab Prezidentin hər gəlişini səbirsizliklə gözləyir, onun yürütdüyü siyasəti ürəkdən bəyənirik.

Müslüm QƏNBƏROV,

Astara rayon Ojəkəran kənd sakini