17 Aprel 2021 11:34
822
SİYASƏT
A- A+

İtaliya mətbuatı: “Prezident İlham Əliyev: İtaliya yaxın dost və tərəfdaşdır”

 

İtaliyanın “İl Giornale”, “Faro di Roma”, “Agenzia Nova” və “MSN Notizie” mətbuat orqanları aprelin 13-də Azərbaycan Respublikasının Prezidenti İlham Əliyevin ADA Universitetində keçirilən "Cənubi Qafqaza yeni baxış: münaqişədən sonra inkişaf və əməkdaşlıq" adlı beynəlxalq konfrasdakı fikirləri barədə yazılar dərc edib.

AZƏRTAC xəbər verir ki, yazılarda 15 ölkədən, o cümlədən İtaliyadan olan beyin mərkəzlərinin nümayəndələrinin iştirak etdiyi konfransın 3 saatdan artıq davam etdiyi vurğulanır.

Bildirilir ki, Azərbaycan Prezidenti tədbirdə iştirak edən italyan araşdırmaçıların suallarını cavablandıraraq qeyd edib ki, “İtaliya bizim yaxın dostumuz və tərəfdaşımızdır. Mən ötən il İtaliyaya dövlət səfərimi yaxşı xatırlayıram. Bildiyiniz kimi, ondan öncə İtaliyanın Prezidenti cənab Mattarella Azərbaycana dövlət səfərinə gəlmişdi və mənim səfərim strateji dialoqun davamı idi. Biz strateji tərəfdaşlıqla bağlı sənəd imzaladıq. Bu, ikinci belə bir sənəd idi. Birincisi, bir neçə il ondan öncə imzalanmışdı. Bu, bizim qarşılıqlı sadiqliyimizi nümayiş etdirir. Həmçinin biz İtaliyaya münaqişənin həlli ilə bağlı birmənalı və ədalətli yanaşmaya görə minnətdarıq. Biz bilirik ki, bu mövqeyi aydın ifadə etmək o qədər də asan məsələ deyil, xüsusilə də Avropa İttifaqı ailəsində Ermənistanın güclü tərəfdarları var. Onlar hər zaman münaqişə qurbanı ilə işğalçı qüvvələri eyni tərəziyə qoymağa çalışıblar. Yəni, mövqeyiniz bu əməkdaşlığın vacib əlaməti olub”.

Yazılarda, həmçinin Prezident İlham Əliyevin fikirlərinə istinadla Azərbaycan-İtaliya əməkdaşlığının müharibə zamanı və müharibədən sonrakı dövrdə sınaqdan keçdiyi vurğulanır. “Bizim siyasi əlaqələrimiz əladır. Biz güclü əməkdaşlığı davam etdiririk. Bu əməkdaşlıq müharibə zamanı və müharibədən sonrakı dövrdə sınaqdan keçib və İtaliya nümayəndə heyətinin azad olunmuş ərazilərə səfəri tərəfimizdən dəstəyin növbəti əlaməti hesab edilmişdir. Yenidənqurma ilə bağlı planlaşdırmanın ilk günlərindən biz İtaliya şirkətlərini dəvət etdik. Bizim əvvəlki illərdə təmaslarımız olub, çünki italyan şirkətləri ölkəmizdə böyük layihələr icra ediblər ki, bura neft-kimya, neft emalı, tikinti və memarlıq layihələri daxildir. Biz italyan şirkətlərinin iştirakını genişləndirmək arzusundayıq. Mən bildirmişdim ki, müharibədən sonra biz dost ölkələrdən olan şirkətləri dəvət edəcəyik. Bu, təbii haldır, çünki müharibə bizim üçün kimin-kim olduğunun aydın göstəricisi idi. Burada müharibə hər şeyi aydın göstərdi”, - deyə dövlətimizin başçısının sözlərinə yer verilir.

Yazılarda (İl Giornale, MSN Notizie), həmçinin vurğulanır ki, konfransda toxunulan əsas mövzularından biri də işğaldan azad olunmuş ərazilərin minalardan təmizləməsi mövzusu olub. Prezident İlham Əliyevin fikirlərinə istinadla bildirilir ki, məcburi köçkünlərin öz evlərinə qaytarılmasında ən böyük problem minalardır və Ermənistan minaların xəritələrini təqdim etmir. Məqalələrdə qeyd olunur ki, “Ermənistan tərəfindən yerləşdirilmiş minalar nəticəsində “səssiz qırğınların” sayı Azərbaycan tərəfinin haqlı olduğunu sübut edir. Belə ki, dekabrdan martın ortalarına qədər 17 mindən çox partlayıcı zərərsizləşdirilib, bununla yanaşı həm hərbi, həm də mülki azərbaycanlılar arasında noyabrın ortalarından aprelin əvvəlinə qədər 20 ölü və 85 yaralı qeydə alınıb”.

Məqalələrdə azad edilmiş ərazilərin minalardan təmizlənməsinin çətin bir proses olduğu, Azərbaycanın çatışmayan xüsusi texnikanı əldə etməli olduğu bildirilir və bu məsələdə İtaliyanın da yardım göstərməsinin vacibliyindən danışılır.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video