Hörmətli redaksiya! "ATV" kanalında yayımlanan "Tanıdım Səni" televiziya müsaqibəsi ilə bağlı fikirlərimi qəzetinizin oxucuları ilə bölüşmək istəyirəm.  Əlbəttə, istedadların axtarılması, üzə çıxarılması və təbliği çox yaxşıdır. Amma baxır necə. Respublikamızın müxtəlif bölgələrini təmsil edən gənc istedadların çıxışları, həqiqətən, alqışa layiqdir. Onlar musiqi, rəsm, idman və başqa sahələrdə öz bacarıqlarını nümayiş etdirirlər. Ən uğurlu çıxışı, ən yaxşı ifanı müəyyən etmək isə təbii ki, münsiflər heyətinin vəzifəsidir. Təəssüf ki, bir çox telekanalların zərərli vərdişə çevirdiyi "SMS" burada da əsas meyar rolu oynayır.

Bir də görürsən ki, müsabiqənin zəif bir iştirakçısı bütün maneələri "SMS"-lərin "köməyi" ilə çox asanlıqla keçib önə çıxır. Qalib gəlmək üçün fitri istedad əsas şərt olsa da, dost-tanışı hesabına toplanan "SMS" ballarla istedadsızların daha güclü rəqiblərini üstələmələrinin şahidi oluruq.

Mən özüm bir çox tanışımla bu verilişlə bağlı fikir mübadiləsi aparmışam. Onların hamısının da yekdil rəyi bu oldu ki, qalibi SMS-lə  müəyyən etmək yolverilməzdir. Bu istedadsız "istedad"ın özünə ziyandır, onun yaşıdlarının heysiyyətinə toxunur, verilişi gözdən salır. Ən nəhayət, belə çıxmırmı ki, kimin qohum-əqrəbası, tanış-bilişi, SMS göndərəni çoxdursa, qələbə ona verilməlidir. Bəs bu qalibin sabahı necə olacaq?! Axı tamaşaçı ağı-qaradan, yaxşını-pisdən ayırmağı bacarır.  

Orxan VƏLİYEV,

Bərdə şəhər sakini