Ucsuz-bucaqsız səmadan keçərək ünvana çatmağımızı təmin edən təyyarələr hazırda ən sürətli nəqliyyat növüdür. Təyyarədən əvvəl isə insanın səmada səyahəti ilk dəfə hava şarı ilə həyata keçirilmişdi.

Bu şarın ixtiraçıları Jozef və Jak Monqolfe qardaşları idi. Onlar 1783-cü ildə parça və kağızdan hazırladıqları şarı  alovun köməyi ilə yaşadıqları Anonnay kəndində havaya qaldırmışdılar. 1 kilometrə qədər yol qət edən bu şardan sonra uçan nəqliyyatın icadına başlanılmışdı.

Bu hədəfə çatan ilk təyyarənin müəllifləri Uilber və Orvill Rayt qardaşlarıdır. Onlar dünyanı dəyişdirən “Flayer” təyyarəsinin ilk pilotlu sınaq uçuşunu 1903-cü ildə 10 km/saat sürətlə Kitti Hauk çimərliyində həyata keçirmişlər. Ərazinin seçilməsi təsadüfi deyildi. Ehtimal edilən qəzanın baş verdiyi halda yumşaq qumun üzərinə eniş nisbətən təhlükəsiz olacaqdı. Məhz elə həmin gün hava olduqca küləkli idi. Bu uçuşdan əvvəl Rayt qardaşları 1901-1902-ci illərdə hazırladıqları təyyarələrlə bir sıra cəhdlər etsələr də, onlar uğursuzluqla nəticələnmişdi.

Qardaşların böyük inam və əzmlə işləməklərinin ardından 1905-ci ildə “Flayer 3” təyyarəsi 19 kilometrlik yolu fasiləsiz uça bildi. Dahi kəşflərinin fərqində olduqları üçün qardaşlar bunu dünyaya çatdırmaq istəyirdilər. Onlar  təyyarələrin satışı üçün Amerika, İngiltərə, Fransa, Rusiya kimi ölkələrə təkliflər göndərdilər. Lakin hökumət onların ağılsız olduqlarının, müraciət etdiyi ölkələrsə özləri də bu icadı edə biləcəklərinin qənaətində idilər.

Sonradan qardaşların bu təklifinə ilk cavabı Fransa dövləti verdi və iddianı dəqiqləşdirmək üçün onların yanına adam göndərdi. Bu xəbərin yayılması Amerikanın da diqqətini çəkdi və 1907-ci ildə Rayt qardaşlarına ilk təyyarə sifarişi verildi. Müraciətlər sərnişinlərin də təyyarədə yer alması yönündə olduğu üçün qardaşlar hazırladıqları təyyarələrə 2 sərnişin oturacağı da əlavə etdilər. Beləliklə, davamlı sifarişlər “Rayt” təyyarə fabrikinin əsasını qoydu.