Dekabrın 26-da Gürcüstan Azərbaycanlıları Konqresi Dünya Azərbaycanlılarının Həmrəylik Günü münasibətilə tədbir keçirmişdir.

Azərbaycan və Türkiyənin Gürcüstandakı səfirliklərinin əməkdaşlarının, ictimaiyyətin nümayəndələrinin iştirak etdikləri tədbir  "Akkord Sənaye-Tikinti İnvestisiya Korporasiyası" ASC-nin dəstəyi ilə keçirilmişdir.

Mərasimdə çıxış edən Gürcüstan Azərbaycanlıları Konqresinin sədri Hüseyn Yusifov ilk dəfə ümummilli lider Heydər Əliyevin təşəbbüsü ilə qeyd olunmuş həmrəylik gününün artıq ümumxalq bayramına çevrildiyini bildirmişdir. H.Yusifov Azərbaycan və Gürcüstan prezidentləri arasında olan dostluq münasibətlərinin ölkələrimiz arasında əməkdaşlığın daha da möhkəmlənməsinə töhfəsini verdiyini diqqətə çatdırmışdır.

Gürcüstan Milli Təhlükəsizlik Şurası katibinin müavini Tamar Kintsuraşvili əsası ulu öndər Heydər Əliyev tərəfindən qoyulmuş bu böyük bayramın Gürcüstanda da təntənəli şəkildə qeyd olunmasından məmnunluğunu bildirmiş, gürcülərin həmişə azərbaycanlılarla həmrəy olduğunu xüsusi vurğulamışdır.

Gürcüstan Prezidentinin müşaviri Mübariz Qarayev bu bayramın ulu öndər Heydər Əliyevin dünya azərbaycanlılarının bir araya gəlmələrində uzaqgörən siyasətinin məntiqi nəticəsi olduğunu söyləmişdir. O qeyd etmişdir ki, illər keçdikcə ümummilli liderin Azərbaycan xalqı qarşısında misilsiz xidmətlərinin daha çox şahidi oluruq.

Kvemo Kartli-Borçalı bölgəsinin qubernatoru David Kirkitadze ölkələrimiz arasında dostluqdan söhbət açmış, Azərbaycan xalqının hər bayramının gürcülərin də bayramı olduğunu demiş və birgə fəaliyyətimizlə bütün problemlərin tezliklə yoluna qoyulacağına əminliyini bildirmişdir.

"Azəryolservis" ASC-nin Gürcüstan nümayəndəliyinin rəhbəri Qurban Piriyev ulu öndər Heydər Əliyevin dünya azərbaycanlılarının birliyi istiqamətində əvəzsiz xidmətlərindən danışmışdır.

Tədbirdə Gürcüstan Azərbaycanlıları Konqresinin rəhbəri Hüseyn Yusifova 3-cü dərəcəli Vaxtanq Qorqasali, Bolnisi Rayon İcra Hakimiyyəti başçısının müavini Ramil Əsədova isə "Şərəf" ordeni təqdim olunmuşdur.

Tədbirdə həmçinin konqresin 2011-ci il nominasiyaları üzrə qaliblər - Gürcüstan Azərbaycanlıları Mədəniyyət Mərkəzinin rəhbəri Fazil Həsənov, "SOCAR Georgia Petroleum" şirkətinin nümayəndəsi Teymur Hacıyev, Azərbaycan Televiziyasının Gürcüstandakı müxbiri Şahismayıl Şəmmədoğlu, Marneuli Gənclər Təşkilatının rəhbəri Emin Əhmədov, "Qarapapaqlar" jurnalının redaktoru Akif Xansultan, "Sarvan" ansamblının rəhbəri Cəmilə Məmmədova, "Uğur" jurnalının redaktoru Musa Hacıyev və başqaları mükafatlandırılmışlar.

İslam ƏLİYEV,

AzərTAc-ın xüsusi müxbiri

Tbilisi