Danışılmış oyunlarla əlaqədar UEFA Çempionlar Liqasından kənarlaşdırılan "Fənərbaxça" klubunun prezidenti Əziz Yıldırım yenidən gündəmə gəlib. Hazırda həbsxanada saxlanılan Yıldırım gözlənilmədən Klublar Birliyinin rəhbəri postundan istefa verdiyini açıqlayıb. O, bunu komandasının qitənin ən nufuzlu klub turnirindən uzaqlaşdırılması ilə əlaqələndirib.

Amma Yıldırım klubdakı vəzifəsindən ayrılmaq fikrində deyil. Onu Klublar Birliyinin rəhbəri postunda kimin əvəzləyəcəyi hələlik bilinmir.

Bu azmış kimi, komanda növbəti sarsıntı ilə üzləşib. Klub prezidentinin vəkili və birinci vitse-prezidenti Nihat Özdəmir baş verənlərdən sonra istefa verdiyini açıqlayıb. O, Türkiyə Futbol Federasiyasının (TFF) Apelyasiya Komitəsinin iclasından sonra "Metris" həbsxanasına gedərək Əziz Yıldırımla söhbətləşib. Özdəmir və "Fənərbaxça"nın vitse-prezidenti Əli Koç daha sonra klubun idarə heyətini təcili toplayıblar. İki saata yaxın davam edən iclasın yekununda Özdəmirin istefa verməsilə yanaşı,  komandanın növbəti mövsümdən etibarən mübarizəni birinci divizionda (Bank Asya 1-ci Liqada) davam etdirməsi ilə bağlı qərar qəbul olunub. Artıq bunun üçün Türkiyə Futbol Federasiyasına rəsmi müraciət də ünvanlanıb.

Məlumat üçün onu da qeyd edək ki, Çempionlar Liqasından kənarlaşdırılmasından sonra "Fənərbaxça" klubunda legioner  futbolçular da  artıq özlərinə yeni klub axtarışına başlayıblar. Yerli mətbuat komandadan ayrılacaq  ilk futbolçunun adını açıqlayıb. Klubu birinci uruqvaylı Dieqo Luqano tərk etmək istədiyini rəhbərliyə bildirib. Deyilənə görə, Uruqvay milli komandasının aparıcı futbolçusu qərarının səhəri günü Fransanın PSJ klubu ilə anlaşıb. Onun transferinin isə ən uzağı bu gün reallaşacağı gözlənilir.