Bizim Zərdabi qəsəbəsi də alma bağları ilə çoxdan məşhurdur. Sovet dönəmində Zərdabi adına sovxoz rayonun ən iri meyvəçilik təsərrüfatı idi. Hər il dövlətə min tonlarla meyvə təhvil verilərdi. Torpaqlar özəlləşdirildikdən sonra sakinlər bu işi daha ürəklə görməyə başlayıb və yaxşı da qazanırdılar.

Bir ilin gəlirinə özlərinə ev də tikə bilirdilər, maşın da alırdılar. Elə indinin özündə də alma bağları çoxlarının dolanışıq yeridir. Düzdür, indi fermerlərin qayğıları artıb, xərcləri də çoxalıb. Ancaq yenə də əlimizdən tutan, ruzimizi verən bağlardır. Dövlətin yardımları, kənd təsərrüfatı vergilərinin ləğv edilməsi bağbanın köməyinə çatır. Burada uşaqdan böyüyə hamı bağa qulluq etməyi bacarır. Qəndi sinab, sarı turş, cır hacı, qanad, antonovka, simirenko kimi qədim meyvə bağları palmetlə əvəz olunsa da, Quba alması xarici ölkələrdən gətirilən meyvələri dadına, ətrinə və tərkibindəki maddələrin zənginliyinə görə geridə qoyur.

Sovetlər dönəmində keçirilən məhsul bayramlarında da meydanlar rayonun əsas məhsulu olan alma ilə bəzənərdi və hamı bu bayrama məxsusi hazırlaşardı. Uzun illərin fasiləsindən sonra bu il birinci dəfə rayon icra hakimiyyəti Qubada Alma bayramı keçirdi. Əslində bu, çoxdan olmalı idi, axı Quba həqiqətən də almanın vətənindir və belə bir gözəl bayrama layiqdir.

Alma bayramında Milli Məclisin deputatları, xarici qonaqlar, Quba ziyalıları, bütün rayonun fəalları iştirak edirdi. Ən çox yadda qalan, ürəkləri riqqətə gətirən isə valideyn himayəsindən məhrum olan iki gəncin - Elnur Kərəmətovla Leyla Qədirovanın rayon icra hakimiyyəti tərəfindən təşkil olunan toy mərasimi oldu. Bu iki gəncin kəbini Qubanın mərkəzi meydanında, minlərlə qubalının və qonaqların iştirakı ilə kəsildi. Toyları da ən gözəl şadlıq sarayında keçirildi. Bəylə gəlini qohum-əqrəba yerinə bütün rayon təşkilatları, Quba ziyalıları təbrik etdi. Ailə həyatına yeni qədəm qoyan iki gəncə içi avadanlıqla dolu ev bağışlandı. Hamı onları təbrik etdi, xeyir-dua verdi.

Qubada alma bayramı iki gəncin toyu ilə başa çatdı və yaddaşımızda əziz bir gün kimi qaldı.

Vüqar ŞİRİNOV,

Quba rayon Zərdabi bələdiyyəsinin sədri