44 günlük Vətən müharibəsi ilə bağlı çəkilən yeni klip belə adlanır

Müharibə od-alov, ölüm-itim deməkdir. Müharibənin qələbə ilə başa çatması isə Zəfər salnaməsinin yaranmasını ortaya qoyur.

Bu qələbə şairlərin poeziyasında, yazıçıların nəsrində, rəssamların rəsmlərində, musiqiçilərin isə nəğmələrində uzunömürlülük qazanır. Ötən il 44 gün ərzində davam edən Vətən müharibəsi də artıq özünün bədii ömrünü yaşamağa başlayıb.

“Əfsanədən gerçəkliyə - bir gülün sehrində” adlı çəkilən yeni klip də məhz Vətən müharibəsində Müzəffər Ordumuzun Ali Baş Komandanı başda olmaqla, xalqımızla birlikdə qazandığı Zəfərə həsr olunub.

Klip sözləri Leyla Əliyevaya, musiqisi Kamala məxsus olan “Xarıbülbül” mahnısına çəkilib. Müğənni Aydın Sani, Əməkdar artist Təyyar Bayramov və oğlu Kənan Bayramovun ifasını aranjemançı Mahir İbrahimov ərsəyə gətirib.   

Oğuz alpaqutunun qanlı köynəyini cırıb bülbüllə sevgilisi Aybükəyə göndərməsi, gülün görüşünə tələsən bülbülü küləyin ayırması, Ağabəyim xatunun Vətən həsrəti... Bütün bu əfsanələrin motivində intizar, ayrılıq önə çəkilsə də, detallarda qovuşma var...

 Əfsanələr sehrlidir. Oradakı obrazlardan hansınınsa yuxusu, ilğımı, mübarizəsi və xoş gerçəkliyi olur. “Xarıbülbül” klipində də ilğımla xatirələrin, yuxu ilə gerçəkliyin sintezi əks olunur.

Bu klip 28 illik həsrətin sonu - Vətən müharibəsindəki qələbəmizə, onu isə bizə qazandıran şəhidlərimizə, yarımcan qazilərimizə, qəhrəman döyüşçülərimizə ithaf edilib.

“Azərbaycan”