Dünən Milli Məclisin Regional məsələlər komitəsində Bələdiyyələrin fəaliyyətinə inzibati nəzarəti həyata keçirən orqanın illik məruzəsi müzakirəyə çıxarıldı. İclası açan Regional məsələlər komitəsinin sədri Arif Rəhimzadə bildirdi ki, bələdiyyələrin fəaliyyətinə inzibati nəzarəti həyata keçirən orqanın illik məruzəsi dinləniləcək.

Sonra Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə bələdiyyələrin fəaliyyətinə inzibati nəzarətin həyata keçirilməsi ilə bağlı məlumat verdi. Bildirdi ki, ötən il bələdiyyələrin fəaliyyətinin müasir tələblər səviyyəsində qurulmasına, onların iqtisadi resurslarından səmərəli istifadə olunmasına və yerli əhəmiyyətli məsələlərin həllində rolunun artırılmasına xüsusi diqqət yetirilib. 2011-ci ildə bələdiyyə üzvləri və qulluqçuları üçün xeyli sayda ixtisasartırma kursları təşkil olunub, ümumən 4500-dən çox bələdiyyə üzvü maarifləndirici tədbirlərdə iştirak edib. Yerli özünüidarə orqanları tərəfindən yol verilən qanunsuzluqların qarşısının alınması və korrupsiya hüquqpozmalarının aşkar edilməsi üzrə ardıcıl tədbirlər görülüb, bu sahədə prokurorluq orqanları ilə qarşılıqlı əlaqələr qurulub. Mehdi Səlimzadə onu da vurğuladı ki, bələdiyyələrə hüquqi və metodiki kömək göstərilməsi, onların fəaliyyətinə inzibati nəzarətin həyata keçirilməsi, qanunsuzluqların qarşısının alınması və yerlərdə demokratik idarəetmənin təşkil olunması ilə bağlı işlər bundan sonra da davam etdiriləcəkdir.

Sonra məruzə ətrafında müzakirələr başlanıldı. Müzakirələrdə deputatlar Fəzail İbrahimli, Qalib Salahzadə, Rüstəm Xəlilov, Tahir Rzayev bələdiyyələrin maliyyə mənbələrinin və büdcəsinin yaxşılaşdırılması və digər məsələlər barədə çıxış edərək hesabatla əlaqədar rəy və təkliflərini bildirdilər.

Regional məsələlər komitəsinin sədr müavini, deputat Fəttah Heydərov bildirdi ki, ənənəvi olaraq Milli Məclisdə adıçəkilən qurumun hesabatı dinlənilir və məruzədən aydın olur ki, son illər yerli özünüidarəetmə sahəsində sürətli inkişaf gedir. F.Heydərovun sözlərinə görə, bələdiyyələr vətəndaşların problemlərini həll etməli, icra hakimiyyəti ilə birgə çalışmalıdırlar.

Regional məsələlər komitəsinin sədri Arif Rəhimzadə hesabat dövründə xeyli iş görüldüyünü dedi. Onun sözlərinə görə, yerli özünüidarə orqanlarının üzərinə düşən bütün vəzifələri yerinə yetirmələri üçün maliyyə vəsaiti kifayət etmir. Ona görə də bununla bağlı müzakirələr aparılmalı və onun həlli istiqamətində işlər görülməlidir.

İclasın sonunda bələdiyyələrin fəaliyyətinə inzibati nəzarəti həyata keçirən qurumun hesabatının Milli Məclisin plenar iclasında müzakirəyə çıxarılması tövsiyə edildi.     

Rəşad BAXŞƏLİYEV,

"Azərbaycan"