01 May 2013 03:05
387
PARLAMENT
A- A+

Azərbaycan Respublikasının Miqrasiya Məcəlləsi hazırlanır

 

Milli Məclisin Hüquq siyasəti və dövlət quruculuğu komitəsinin 30 aprel tarixli iclasında 11 qanun layihəsi müzakirəyə çıxarılıb. Komitə sədri Əli Hüseynli əvvəlcə "Azərbaycan Respublikasının Miqrasiya Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında" qanun layihəsi barədə məlumat verib. Bildirib ki, Azərbaycanın çevik inkişaf etməsi miqrasiya sahəsində də qanunvericiliyin inkişaf etdirilməsini zəruriləşdirir. Bu baxımdan Dövlət Miqrasiya Xidməti tərəfindən hazırlanan yeni qanun layihəsi təqdirəlayiqdir. Onun sözlərinə görə, miqrasiya qanunvericiliyi Azərbaycan Respublikasının Konstitusiyasından, bu məcəllədən, Azərbaycan Respublikasının qanunlarından, Azərbaycanın tərəfdar çıxdığı beynəlxalq müqavilələrdən və onlara uyğun olaraq qəbul olunmuş digər normativ-hüquqi aktlardan ibarətdir.

Təqdim olunan qanun layihəsində qeyd olunur ki, xarici ölkədə pasportunu itirmiş, pasportu oğurlanmış və yararsız hala düşmüş, pasportunun etibarlılıq müddəti bitmiş Azərbaycan vətəndaşının və onunla birgə Azərbaycana qayıdan 18 yaşına çatmayan və ya xarici dövlətdə 18 yaşına çatmış Azərbaycan vətəndaşı olan övladının ölkəyə qayıtmaq hüququ Azərbaycan Respublikasına qayıdış şəhadətnaməsi ilə həyata keçirilir. Bu məcəllənin 11.2 maddəsi (yetkinlik yaşına çatmayan vətəndaş ölkədən valideynlərinin biri ilə getdikdə digər valideynin notarial qaydada təsdiq edilmiş razılığı tələb olunur) istisna olmaqla yetkinlik yaşına çatmayan vətəndaş ölkədən valideynləri, övladlığa götürəni, himayəçisi və ya qəyyumu ilə gedə bilər. Bundan başqa, Azərbaycana gəlmək üçün viza tələb olunduğu hallarda əcnəbilər və vətəndaşlığı olmayan şəxslər bu məcəllə ilə müəyyən olunmuş qaydada viza almalıdırlar. Elm və təhsil üçün alınan vizada isə ölkədə qalma müddəti 90 günədək müəyyən edilir.

Komissiya üzvləri qanun layihəsi üzərində işləməyi qərara aldılar.

İclasın gündəliyində olan "Azərbaycan Respublikasının Cinayət Məcəlləsinə dəyişikliklər edilməsi haqqında" və "Azərbaycan Respublikasının İnzibati Xətalar Məcəlləsində dəyişikliklər edilməsi haqqında" qanun layihələrinin çox peşəkar hazırlandığı vurğulandı. Hər iki qanun layihəsi Milli Məclisin plenar iclasına tövsiyə olundu.

Müzakirəyə çıxarılan "İcra haqqında" Azərbaycan Respublikasının Qanununa dəyişikliklər edilməsi haqqında, "Azərbaycan Respublikası Cinayət-Prosessual Məcəlləsində dəyişikliklər edilməsi barədə", "Ölkədən getmək, ölkəyə gəlmək və pasportlar haqqında" qanuna dəyişiklik edilməsi barədə, "Azərbaycan Respublikasının Mülki Məcəlləsində dəyişiklik edilməsi haqqında", "Daşınmaz əmlakın dövlət reyestri haqqında" qanuna dəyişikliklər edilməsi barədə qanun layihələri müzakirədən sonra Milli Məclisin plenar iclasına tövsiyə olundu.

Həmçinin "Avtomobil yolları haqqında", "Məhkəmələr və hakimlər haqqında" və "Prokurorluq orqanlarında qulluq keçmə haqqında" qanunda dəyişikliklər edilməsi barədə olan qanun layihələri də müzakirə edildikdən sonra Milli Məclisin plenar iclasına tövsiyə edildi.

 

"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video