12 Iyul 2012 03:07
457
PARLAMENT
A- A+

Azərbaycan ilə əlaqələrin inkişafı Tacikistanın xarici siyasətinin prioritet istiqamətlərindəndir

 

Azərbaycana rəsmi səfəri çərçivəsində Tacikistan Prezidenti Emoməli Rəhmon iyulun 11-də Milli Məclisdə olmuşdur.

Parlamentin binası önündə Tacikistan Prezidentini Milli Məclisin sədri Oqtay Əsədov və digər rəsmi şəxslər qarşılamışlar.

Emoməli Rəhmon əvvəlcə parlamentin iclas zalları ilə tanış olmuş, deputatların fəaliyyəti üçün yaradılmış şərait, burada tətbiq olunan müasir texnologiya, qanun yaradıcılığı prosesi ilə maraqlanmışdır. 

Parlamentlə tanışlıqdan sonra Tacikistan Prezidenti Emoməli Rəhmon Milli Məclisin sədri Oqtay Əsədovla görüşmüşdür.

Oqtay Əsədov Azərbaycan-Tacikistan münasibətlərindən danışaraq əlaqələrimizin dərin tarixi kökləri olduğunu bildirmişdir. Sədr demişdir ki, müstəqilliyimizi bərpa etdikdən sonra əlaqələrimiz yeni müstəvidə inkişaf etmişdir. Münasibətlərimizin yüksək səviyyəyə çatmasında dövlətlərimizin başçılarının rolu böyükdür. Hər iki ölkənin prezidentlərinin qarşılıqlı səfərləri zamanı 20-dən çox dövlətlərarası və hökumətlərarası sənəd imzalanmışdır. Bu sənədlər əlaqələrimizin hərtərəfli inkişafı üçün möhkəm hüquqi baza yaratmışdır.

Dövlətlərarası əlaqələrin inkişafında parlamentlərin rolunu xüsusi vurğulayan O.Əsədov hər iki ölkənin qanunverici orqanındakı dostluq qruplarının fəaliyyətindən razılığını bildirmişdir. Beynəlxalq qurumlarda birgə əməkdaşlığın səmərəsindən, Ermənistanın işğalçılıq siyasəti nəticəsində yaranmış Dağlıq Qarabağ münaqişəsindən danışan Milli Məclisin sədri Azərbaycanın haqq işini müdafiə etdiyinə görə Tacikistan tərəfinə təşəkkürünü bildirmişdir.

Prezident Emoməli Rəhmon demişdir ki, Azərbaycan ilə əlaqələrin inkişafı Tacikistanın xarici siyasətinin prioritet istiqamətlərindəndir. Azərbaycan müstəqilliyini bərpa etdikdən sonra sürətli inkişaf yolu keçmişdir. Mən sonuncu dəfə Bakıda 5 il əvvəl olmuşam. Ötən müddət ərzində Bakı şəhəri əsaslı şəkildə dəyişmiş və gözəlləşmişdir.

Tacikistan dövlətinin başçısı qazanılan böyük uğurlara görə Azərbaycan xalqını təbrik etmişdir.

İkitərəfli əməkdaşlığın inkişafı üçün mövcud imkanlardan danışan Prezident demişdir: "Tacikistanın Azərbaycanın təcrübəsini öyrənməsinə böyük ehtiyac vardır. Əminəm ki, bu səfər əməkdaşlığımızı daha da inkişaf etdirəcəkdir. Təqdirəlayiq haldır ki, Bakı ilə Düşənbə arasında birbaşa aviareys açılmışdır. İnanırıq ki, yeni aviareys ölkələrimiz arasında iqtisadi, ticarət, turizm və digər sahələrdə əməkdaşlığın inkişafına, yeni layihələrin reallaşdırılmasına geniş imkanlar açacaqdır".

Tacikistan Prezidenti iqtisadi əlaqələrin inkişafına, qarşılıqlı sərmayə qoyuluşuna, ticarət dövriyyəsinin artmasına şərait yaradan 500-dən çox investisiya layihəsinin mövcudluğunu bildirmiş və hər iki ölkənin iş adamları üçün biznes forumların, "dəyirmi masa"ların keçirilməsinin əhəmiyyətini qeyd etmişdir.

Sonda Tacikistan Prezidenti Azərbaycan parlamentinin fəaliyyətinə uğurlar arzulamışdır.

 

AzərTAc

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video