Bu fikirləri Azərbaycan Milli Elmlər Akademiyasının prezidenti, akademik Akif Əlizadə AzərTAc-a müsahibəsində demişdir. O bildirmişdir ki, konfransda 90 illik muxtariyyət dövründə Naxçıvanın əldə etdiyi nailiyyətlər, müxtəlif zamanlarda siyasi, iqtisadi, hərbi baxımdan ortaya çıxan və uğurla həll olunan problemlər barədə dərin elmi araşdırmalara əsaslanan çıxışlar olmuşdur.
Akif Əlizadə xüsusi vurğulamışdır ki, Naxçıvanda yüksək səviyyəli beynəlxalq elmi konfransların keçirilməsi, həm muxtar respublika rəhbərliyinin elmin inkişafına göstərdiyi diqqətin nəticəsidir, həm də qədim diyarda formalaşan ciddi elmi potensialla əlaqədardır. Ulu Öndərin Naxçıvan Muxtar Respublikasında elmi-tədqiqat qurumlarının fəaliyyətinin gücləndirilməsi, mövcud elmi pоtensialdan istifadə оlunmasının səmərəliliyinin artırılması, Naxçıvanın tarixi, arxeоlоgiyası, etnоqrafiyası və təbii sərvətlərinin öyrənilməsi üçün daha əlverişli şəraitin yaradılması məqsədilə 2002-ci il avqustun 7-də imzaladığı sərəncamla Azərbaycan Milli Elmlər Akademiyasının Naxçıvan Bölməsinin təsis edilməsi tarixi hadisə idi. Bu gün AMEA-nın Naxçıvan Bölməsində formalaşan elmi potensial Azərbaycan elminin inkişafına böyük töhfələr verməkdədir.
Azərbaycan Milli Elmlər Akademiyasının prezidenti “Naxçıvanın muxtariyyəti tarixi nailiyyətdir” beynəlxalq konfransında AMEA-nın Naxçıvan Bölməsindən üç akademikin, on iki müxbir üzvün iştirakını yüksək qiymətləndirmiş, bunun əhəmiyyətli bir göstərici olduğunu nəzərə çarpdırmışdır. O vurğulamışdır ki, bu gün Naxçıvanda uğurlu elmi-tədqiqat işlərinin aparılması, naxçıvanlı alimlərin nüfuzlu beynəlxalq elmi konfranslarda iştirakı muxtar respublikada elm sahəsində əldə edilən tərəqqinin bariz nümunəsidir.