ABŞ-ın Oklahoma ştatı Senatının nümayəndələri oktyabrın 22-də Milli Məclisin Azərbaycan-ABŞ parlamentlərarası əlaqələr üzrə işçi qrupunun üzvləri ilə görüşmüşlər.

AzərTAc xəbər verir ki, görüşdə işçi qrupun rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Azərbaycan haqqında qonaqlara ətraflı məlumat vermişdir. O demişdir ki, regionun lider dövləti olan Azərbaycanın digər mədəniyyətlərə və dinlərə münasibətdə çoxəsrlik tolerantlıq ənənələri vardır. Qədim tarixə, zəngin mədəni irsə malik Azərbaycan bu gün inkişafının yeni mərhələsinə qədəm qoymuşdur.

Azərbaycanın mötəbər beynəlxalq qurumlarla yaxından əməkdaşlıq etdiyini deyən S.Seyidov ölkəmizin antiterror koalisiyası tərkibində fəaliyyəti haqqında danışmış, sülhməramlılarımızın Əfqanıstanda və İraqda həyata keçirilən əməliyyatlarda fəal iştirak etdiklərini vurğulamışdır. Qeyd edilmişdir ki, Azərbaycan terrorizmə qarşı mübarizədə ABŞ-a dəstək verən ilk ölkələrdən biri olmaqla yanaşı, terrorun bütün formalarını qətiyyətlə pisləyir.

Ermənistan-Azərbaycan, Dağlıq Qarabağ münaqişəsinin acı nəticələrindən danışan S.Seyidov Azərbaycan torpaqlarının 20  faizinin Ermənistan silahlı qüvvələri tərəfindən işğal edildiyini, bir milyondan çox azərbaycanlının məcburi köçkünə çevrildiyini diqqətə çatdırmışdır. O bildirmişdir ki, münaqişənin həll olunmaması regionun inkişafı yolunda əsas maneədir.

Görüşdə Azərbaycan ilə ABŞ arasında əlaqələrin daha da genişləndirilməsi barədə fikir mübadiləsi aparılmışdır.