Yeni il ərəfəsində sosial layihələrin icrası ilə gerçəkləşən dövlət qayğısı Sabirabad rayon sakinlərinin bayram sevincini ikiqat artırmışdır.

Respublika Prezidenti İlham Əliyevin sərəncamı ilə 17 kənd yaşayış məntəqəsini birləşdirən uzunluğu 68 kilometr olan Sabirabad-Qasımbəyli, Narlıq-Cavad və Qəzli-Qaraqaşlı avtomobil yolu əsaslı şəkildə yenidən qurulmuşdur. Yolun 15 kilometrlik hissəsi bu ilin may ayında istifadəyə verilmişdir. O zaman bölgəyə səfər edən dövlət başçısı yolun açılış mərasimində iştirak etmişdir. Yolun qalan hissəsi də sürətlə yenidən qurulub bölgə əhalisinin istifadəsinə verilmişdir.

Rayonun Qalaqayın kəndinə təbii qaz verilməsi də yeni il ərəfəsinə təsadüf etdi. Məişət rahatlığına qovuşan kənd sakinlərinin sevinci hədsiz idi. 53 kilometrlik yolun açılışı və Qalaqayın kəndinə təbii qaz verilməsi münasibətilə keçirilən mərasimlərdə çıxış edən Sabirabad Rayon İcra Hakimyyətinin başçısı Nazim İsmayılov ölkəmizin davamlı xarakter alan dinamik sosial-iqtisadi inkişafından, respublika Prezidenti İlham Əliyevin sabirabadlılara göstərdiyi böyük qayğı və diqqətdən minnətdarlıqla danışdı. Əminliklə vurğuladı ki, Muğanın qədirbilən camaatı bundan sonra da Heydər Əliyev siyasi kursuna  sədaqətli olacaq, dövlət başçısının ətrafında sıx cərgələrlə birləşəcək, qazandıqları yeni-yeni əmək nailiyyətləri ilə ölkə iqtisadiyyatının möhkəmlənməsinə sanballı töhfələr verəcəklər.

Lazım QULİYEV

"Azərbaycan"