2018-ci ilin Prezident seçkilərinin yüksək səviyyədə, demokratik şəraitdə keçirilməsi və Azərbaycan xalqının cənab İlham Əliyevə bir daha yüksək etimad göstərməsi ölkə vətəndaşlarının öz rəhbərinə olan sonsuz inamının və məhəbbətinin ifadəsi idi. Çünki cənab

İlham Əliyev ilk dəfə Prezident seçilərkən qətiyyətlə bəyan etmişdi ki, “Mən hər bir Azərbaycan vətəndaşının Prezidenti olacağam” və fəaliyyəti dövründə də öz vədinə sədaqətlə əməl etmişdi. Bu illərdə Azərbaycan iqtisadiyyatı xeyli dərəcədə inkişaf etdirilmiş, çox mühüm sosial layihələr, proqramlar həyata keçirilmiş, beynəlxalq aləmlə münasibətlər yaxşılaşdırılmışdır. İnsanların rifah halı yüksəlmiş, işsizlik aradan qaldırılmış, güclü ordu yaradılmışdır. Xalq Aprel döyüşlərində Ali Baş Komandanın cəsarətinin, qətiyyətinin şahidi olmuşdur.

İnsanlar inanırdılar ki, cənab İlham Əliyev işğal altında olan torpaqları da mütləq təcavüzkarlardan azad edəcək, uzun illər od-ocaq həsrəti çəkən sakinlər öz ata-baba yurdlarına qayıdacaq, Azərbaycanda yeni, xoşbəxt bir həyat başlanacaqdır.

Buna ölkə Prezidentinin uğurlu fəaliyyəti, çıxışları, vətən, xalq sevgisi, torpağa bağlılığı, düşmənə sonsuz nifrəti, beynəlxalq aləmdə qazandığı nüfuz, həyata keçirdiyi düşünülmüş siyasət, xalqla birliyi əsas verirdi. Cənab İlham Əliyev ən mötəbər tədbirlərdə ilk olaraq Qarabağ məsələsini qaldırırdı, ermənilərin təcavüzkarlığını qabardırdı, əsaslı faktlarla erməni faşizmini, separatçılığı, terroru ifşa edirdi, təcavüzkarlara dəstək verənlərə öz yerini göstərirdi. “Biz torpaqlarımızı işğaldan azad edəcəyik, üçrəngli bayrağımızı Şuşada dalğalandıracağıq, Qarabağ Azərbaycandır” ifadələrini dönə-dönə söyləməklə,  təkrar etməklə xalqı qələbəyə, mübarizəyə ruhlandırır, həm də düşmənə bir mesaj verirdi.

Prezidentimiz ilk növbədə öz gücünə, iradəsinə, qətiyyətinə, həm də xalqının qüdrətinə, əyilməzliyinə, ona olan inamına, məhəbbətinə, ordumuzun, əsgər və zabitlərimizin yenilməzliyinə inanırdı. Dövlət başçısı həm də Azərbaycan iqtisadiyyatının davamlılığına, başda Türkiyə rəhbərləri, xalqı olmaqla ölkəmizə dəstək verən dövlətlərin səmimiyyətinə, bir çox beynəlxalq təşkilatların bizə göstərdikləri sağlam münasibətlərə arxalanırdı. Cənab İlham Əliyev Prezident seçildiyi ilk gündən sülh, əmin-amanlıq və əməkdaşlıq uğrunda mübarizə aparmış və öz əməli fəaliyyəti nəticəsində bu nailiyyətləri, dostluğu, səmimiyyəti, birliyi əldə etmişdi. Sözsüz ki, çətin anda bu bəşəri dəyərlərə sadiqlik, haqq-ədalət uğrunda mübarizə öz bəhrələrini verməli idi və verdi. Bu gün nəinki Azərbaycan xalqı, bütün Türk dünyası, tərəqqipərvər bəşəriyyət cənab İlham Əliyevlə fəxr edir. O, dünyada insan azadlığının, təhlükəsizliyinin, sağlamlığının qarantı kimi çıxış edir, qalib bir xalqın oğlu olaraq erməni faşizmi üzərində tarixi qələbə qazanılmasına baxmayaraq yenə də qonşu dövlətlər, dünya xalqları ilə qarşılıqlı əməkdaşlıq, mehriban şəraitdə yaşamağa böyük önəm verir və bu yolda əlindən gələni əsirgəmir.

Məhz bütün bunlara görə də xalq öz Prezidentini sevir, onun siyasi gedişlərini, insanların rifah halı, gələcəyi, ölkənin inkişafı üçün həyata keçirdiyi tədbirləri dəstəkləyir və öz münasibətləri, fəaliyyətləri ilə cənab İlham Əliyevlə birlikdə olduqlarını nümayiş etdirirlər.

Tahir RZAYEV,

Milli Məclisin Aqrar siyasət komitəsinin sədri