Bakı Musiqi Akademiyasının professoru, görkəmli bəstəkar, xalq artisti, "Şöhrət" ordenli Musa Mirzəyev 10 ildən artıqdır ki, Astara Uşaq Musiqi Məktəbi ilə sıx əlaqə saxlayır, müəllim və şagirdlərlə görüşür, ildə 2 dəfə ustad dərsləri keçir, məsləhətlər verir.

Musa müəllim məktəbə bağlılığını belə izah edir:

- Məktəbdə müəllimlərin musiqi alətlərində çalğını, muğamları, xalq və bəstəkar mahnılarını ifa etməyi öyrətmək bacarığı məni razı salır. Yaxşı haldır ki, məktəbin şagirdləri festivallarda, muğam müsabiqələrində uğurla çıxış edir, fəxri yerlər tuturlar. Onu da deyim ki, bu məktəbdə çalışan müəllimlərin bir neçəsi Musiqi Akademiyasının məzunudur, bir neçəsi isə hazırda orada qiyabi təhsil alır. Fortepiano sinfində keçirilən dərsdə iştirak edərkən Aybəniz Dadaşovanın şagirdlərə ustalıqla dərs keçdiyinin şahidi oldum. Əminəm ki, bu məktəbin yetirmələri gələcəkdə daha çox uğurlar qazanacaqlar.

Artıq görkəmli bəstəkar Musa Mirzəyevin Astara Uşaq Musiqi Məktəbinə göstərdiyi qayğı öz bəhrəsini verməkdədir. Respublikamızda keçirilən müsabiqələrdə məktəbin şagirdləri həmişə uğurla çıxış edir, ifaları yüksək qiymətləndirilir.

Astaranın əsrarəngiz gözəlliyi ilə bərabər istedadlı uşaq və gəncləri də çoxdur. Elə bu səbəbdəndir ki, hər iki ildən bir Astarada Respublika Uşaq Muğam Müsabiqəsi keçirilir.

Məktəbin direktoru Şamil Bayramov deyir ki, bu məktəb 42 ildir fəaliyyət göstərir. Musa müəllimin məktəbimizlə sıx əlaqə saxlaması, ustad dərsləri keçməsi gənc musiqiçilərin yetişməsində önəmli rol oynayır.

Sakitağa KƏRİMOV,

"Astara" qəzetinin redaktoru