12 Fevral 2012 12:02
350
Mədəniyyət
A- A+

Tanınmış bəstəkar Elza İbrahimova son mənzilə yola salınmışdır

 

Fevralın 11-də tanınmış bəstəkar, əməkdar incəsənət xadimi, xalq artisti, Azərbaycan Respublikası Prezidentinin fərdi təqaüdçüsü Elza İbrahimova son mənzilə yola salınmışdır.

Vida mərasimində tanınmış mədəniyyət xadimləri və ictimaiyyət nümayəndələri iştirak etmişlər.

AzərTAc xəbər verir ki, mərhumun cənazəsi Azərbaycan İncəsənət Gimnaziyasının binasında matəmsayağı bəzədilmiş postament üzərinə qoyulmuşdu.

Mərhumun tabutu önünə Azərbaycan Respublikasının Prezidenti adından əklil qoyulmuşdur. Cənazənin ətrafına hökumət təşkilatları və müxtəlif kollektivlər adından da əklillər düzülmüşdür.

Elza İbrahimovanın həmkarları, tanışları, tanınmış mədəniyyət və incəsənət xadimləri, mərhumun bənzərsiz yaradıcılığının pərəstişkarları axın-axın İncəsənət Gimnaziyasının binasına gəlir, görkəmli sənətkara və gözəl insana son borclarını verirdilər.

Matəm mitinqində Azərbaycan Bəstəkarlar İttifaqının sədri, xalq artisti, professor Firəngiz Əlizadə, Azərbaycan Milli Konservatoriyasının rektoru, xalq artisti Siyavuş Kərimi və əməkdar incəsənət xadimi, professor Nazim Kazımov çıxış edərək Elza İbrahimovanın mənalı ömür yolu və zəngin yaradıcılığından danışmışlar.

Bildirilmişdir ki, böyük bəstəkarımız Qara Qarayevin sinfində təhsil alan Elza İbrahimova hələ tələbəlik illərindən özünü tanıda  bilmişdir. Onun fortepiano və skripka üçün konsertləri, simfonik poema, oratoriya və operaları daim öz orijinallığı ilə diqqəti cəlb etmişdir. E.İbrahimova müasir Azərbaycan musiqisində mahnı janrının inkişafına da əvəzsiz töhfələr vermişdir. Onun müxtəlif illərdə bəstələdiyi və korifey sənətkarlarımızın repertuarında xüsusi yer tutan mahnıları müəllifinə daim şöhrət gətirmişdir.

Diqqətə çatdırılmışdır ki, Elza İbrahimova ölkəmizdə musiqiçi kadrların hazırlanması işinə də böyük əmək sərf etmişdir.

Elza İbrahimovanın musiqi mədəniyyətinin inkişafı sahəsində nailiyyətləri həmişə yüksək qiymətləndirilmişdir. O, Azərbaycan Respublikasının və o cümlədən Dağıstan Respublikasının xalq artisti fəxri adlarına layiq görülmüşdür.

Vurğulanmışdır ki, hələ sağlığında xalqımızın qəlbində özünə əbədi abidə qoymuş Elza İbrahimova Azərbaycan musiqisi yaşadıqca yaşayacaqdır.

Mərhumun ailəsi adından çıxış edən qardaşı Çingiz İbrahimov bacısının xatirəsinə göstərilən hörmət və ehtirama görə ölkə rəhbərliyinə dərin minnətdarlığını bildirmişdir.

Sonra böyük sənətkarın cənazəsi son mənzilə yola salınmışdır.

Mərhum Fəxri xiyabanda torpağa tapşırılmışdır.

Allah rəhmət eləsin!

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video