22 Iyun 2021 01:28
16065
SİYASƏT
A- A+

Şuşa Bəyannaməsi - sülh bəyannaməsi

 

Biz həmişə Tanrıya üz tutanda gözlərimizi göyə zilləyirik.

Əslində, hamımız Allahın səmanın sonsuzluğunda qərar tutduğunu qəbul etmişik.

Odur ki,  yüksəkliyə qalxanda Allaha yaxınlaşdığımızı zənn edirik.

Şuşa Azərbaycanın ən hündür nöqtələrindən birində yerləşdiyindən Allaha yaxın şəhər sayılır.

Belə şəhərlərdə, adətən, xoş istək və arzular səsləndirilir, onların daha tez reallaşacağına inam olur.

Azərbaycan xalqını böhrandan, dövlətini və dövlətçiliyini itirmək təhlükəsindən xilas edən Milli Qurtuluş Günündə Azərbaycan-Türkiyə dostluğunun, qardaşlığının və birliyinin yeni təsdiqi sayılan Şuşa Bəyannaməsinin məhz burada imzalanmasının ikiqat rəmzi mənası var.

Bu, Uca Tanrının da yaxından xeyir-dua verdiyi birlikdir, sazişdir!

Bu birlik Qarabağın daha etibarlı müdafiəsini təmin edəcəkdir!

Üstəlik, bu birlik Şuşa da daxil bütün Qarabağın sürətlə yenidən tikilib qurulmaqla cənnətə çevrilməsinə öz töhfəsini verəcəkdir!

Bu birlik həm də dosta sevinc, fərəh gətirir, düşmənə gözdağına çevrilir!

***

I Qarabağ müharibəsində ona görə məğlub olduq ki:

 

* Xalq həqiqi rəhbərindən - Ulu Öndər  Heydər Əliyevdən uzaq düşmüşdü;

* Dövlətə maymaqlar, qorxaqlar, səriştəsizlər, şəxsi maraqlarını milli mənafedən üstün tutanlar başçılıq edirdilər;

* Düzgün daxili və xarici siyasət formalaşdırılmamışdı;

* Vaxtında ordu qurulmadı və silahlandırılmadı;

* Torpaqların etibarlı müdafiəsi təşkil olunmadı;

* Ölkədə sabitliyin pozulması, özbaşınalığın və qanunsuzluğun baş alıb getməsi vətəndaş müharibəsinə, ən nəhayət, torpaqların itirilməsinə səbəb oldu!

* Məğlubiyyətin bir səbəbi də Ermənistanın bir neçə mənbədən silahlandırıldığı, maliyyələşdirildiyi və digər formalarda yardım göstərildiyi halda Azərbaycanın tək və köməksiz qalması idi.

Hətta qardaş Türkiyə də bizə həmin vaxt yardım göstərə bilmədi.

***

Münaqişənin ilkin mərhələsində Azərbaycan problemin sülh yolu ilə, danışıqlar vasitəsilə həllinin tərəfdarı olduğunu açıq şəkildə ortaya qoydu.

Ermənistan tərəfi isə bunu güzəşt və qorxaqlıq əlaməti kimi qiymətləndirərək daha da azğınlaşdı.

Bəli, ötən əsrin 90-cı illərində meydanda zəif Azərbaycan və arxalı Ermənistan var idi!

Ermənistan həmişəki kimi, həm də xain xislətinə sadiq olaraq bu məqamdan bəhrələndi, Dağlıq Qarabağı və ətrafdakı yeddi rayonu işğal etdi.

Azərbaycan yenə də məsələnin çözülməsinin sülh danışıqları yolu ilə, eyni zamanda ərazi bütövlüyü çərçivəsində həllinin tərəfdarı olduğunu söylədi.

Lakin Ermənistan və münaqişəni nizamlamalı olan ATƏT-in Minsk qrupu sözdə bu ideyanı dəstəkləsə də, əməldə “özünüz aranızda hansı razılığa gəlsəniz, biz də onu qəbul edəcəyik” və daha sonra “reallıqla hesablaşmaq lazımdır” kimi məkrli və qəbuledilməz mövqe sərgilədilər.

Beynəlxalq qurumlardan heç bir təsir və təzyiq görməyən Ermənistan Azərbaycan torpaqlarını öz gücünə işğal etdiyinə inanaraq “qalib millət”, “məğlubedilməz ordu” eyforiyasına uyaraq sözün həqiqi mənasında qudurdu və bizi yeni ərazilərin işğalı ilə hədələməyə başladı.

Amma iki vacib məqamı unutmuşdu:

Birincisi, zamanı və onun gedişatını!

İkincisi isə, Azərbaycana İlham Əliyev kimi siyasət nəhənginin və qüdrətli sərkərdənin rəhbərlik etdiyini!

44 günlük Vətən müharibəsi başlayandan bir neçə gün sonra ciddi səhv və yekəbaşlıq etdiyini anladı!

Döymədiyi qapı, zəng etmədiyi dövlət başçısı, yalamadığı daban qalmadı!

Lakin Müzəffər Ali Baş Komandan İlham Əliyevin prinsipial mövqeyi və şərti - Ermənistan öz qoşunlarının işğal ərazilərindən çıxarılması ilə bağlı konkret tarix göstərilən qrafik təqdim edilməyənə və kapitulyasiya sənədini imzalamayana qədər hərbi əməliyyatlar dayandırılmadı.

***

XXI əsrin ən müasir müharibəsini aparan, ən yeni strategiya və taktika tətbiq edən Azərbaycan 44 gün ərzində düşməni təkcə hərb meydanında deyil, diplomatiya sahəsində və informasiya müharibəsində də darmadağın etdi!

Qısa müddətdə 3 cəbhədə möhtəşəm zəfər qazanılmasının bir neçə səbəbi vardı:

Əvvəla, Azərbaycana və onun qüdrətli Ordusuna cənab İlham Əliyev kimi görkəmli dövlət xadimi, mahir sərkərdə rəhbərlik edirdi.

İkincisi, ordu qələbəyə köklənmiş, mətin və təcrübəli əsgər və zabitlərlə komplektləşdirilmiş, ən yeni silah və vasitələrlə təmin edilmişdi.

Üçüncüsü, dövlət başçısı İlham Əliyev hakimiyyətdə olduğu müddətdə diplomatiya sahəsində böyük uğurlara imza atmış, müəllifi olduğu “hücum diplomatiyası” taktikasını tətbiq etmiş, Ermənistan-Azərbaycan Dağlıq Qarabağ münaqişəsi ilə bağlı əsl həqiqətləri dünyaya çatdırmış və Ermənistanın işğalçı simasını yetərincə ifşa etmişdi.

Dördüncü, hərbi əməliyyatlar davam edən müddətdə cənab İlham Əliyev dünya KİV-inə açıq oldu, jurnalistlərin bütün suallarını cavablandırdı, problemin mahiyyəti ilə bağlı dünya ictimaiyyətini maarifləndirdi, feyk xəbərləri təkzib və ifşa etdi, informasiya müharibəsinin şəriksiz qalibi oldu.

Beşincisi və ən əsası, qardaş Türkiyə bu müharibədə əvvəldən sonadək bütün məsələlərdə daim dəstəyimiz oldu, arxamızda durdu, hər bir köməyi göstərdi və indi də göstərir!

Məhz bu birlik, dostluq, qardaşlıq Qarabağın işğaldan azad olunmasının və bu gün yenidən dirçəldilməsinin təməli, əsasıdır!

Şuşa Bəyannaməsi isə tarixi birliyimizin yeni və daha yüksək mərhələsinə  keçidinin həm də rəsmən təsdiqlənməsidir!

***

Əslində, Şuşa Bəyannaməsi indiyədək iki qardaş ölkə arasında mövcud olan və hamıya bəlli məsələlərin bir daha ucadan söylənilməsidir:

 

* Azərbaycana qarşı hər hansı hədə, təhlükə və ya təcavüz törətmək istəyənlər öz qarşılarında həm də Türkiyəni görəcəklər;

* Türkiyə ordu quruculuğunda daim Azərbaycana dəstək olacaq, əsgər, zabit və hərbi mütəxəssislərin hazırlanmasında yaxından kömək edəcək;

* Hər iki dövlətin hərbi sənaye kompleksi birgə fəaliyyət göstərəcək, Türkiyənin ən müasir silahları ölkəmiz üçün əlçatan olacaq;

* Hərbin bütün sahələrində - məsləhətləşmələrdən tutmuş təcavüzə qarşı birgə müdafiəyədək hər iki qardaş dövlət daim bir-birinin yanında olacaq, birgə fəaliyyət göstərəcəkdir.

 

Bütün bunlardan öncə Şuşa Bəyannaməsi, əslində, həm də sülh bəyannaməsidir, sülhsevər bəyannamədir:

O, bölgədəki 6 dövləti Cənubi Qafqazın bütün imkanlarından bərabər şəkildə bəhrələnməyə çağırır və buna şərait yaradır!

Bölgədə təhlükə mənbəyi rolunu oynayan, işğalçı dövlət Ermənistanı əməkdaşlığa dəvət edir, qisasçılıqdan uzaq durmağa, öz dövlətinin və xalqının gələcək inkişafı üçün Zəngəzur dəhlizindən bəhrələnməyə səsləyir!

Hətta qardaş Türkiyənin Prezidenti Rəcəb Tayyib Ərdoğan açıq şəkildə bildirdi ki, Ermənistanın Azərbaycanla sülh müqaviləsi bağlayacağı təqdirdə Türkiyə dövləti sərhədlərin açılması məsələsinə yenidən baxa bilər, Ermənistan blokadadan qurtular;

Bütövlükdə Şuşa Bəyannaməsi prinsipcə bölgədə sülhün təmininə, Zəngəzur dəhlizinin açılmasına töhfələr verməklə yeni nəqliyyat dəhlizindən yararlanacaq bütün dövlətlərə təhlükəsiz və səmərəli əməkdaşlıq şəraiti də yaradır!

Şuşa Bəyannaməsi əməlcə və mahiyyətcə sülh bəyannaməsidir!

Bu sənəd Cənubi Qafqaz regionuna sülh, əmin-amanlıq və əməkdaşlıq təklif edir.

Həm də onun yolunu, imkanlarını göstərir.

Sənədin arxasında iqtisadi imkanlar, nəhəng layihələr, eyni zamanda, hərbi güc də dayanır!

Azərbaycan, Türkiyə və Rusiya Cənubi Qafqazda sülhün və əməkdaşlığın bərqərar olunmasında maraqlıdır.

Bunu dəfələrlə bəyan etmiş və müxtəlif sənədləri imzalamaqla xoş niyyətlərini ortaya qoymuşlar.

İran və Gürcüstan da bölgənin nəqliyyat və logistika imkanlarından bəhrələnməyin tərəfdarıdırlar.

Nala-mıxa döyən isə təkcə Ermənistandır!

Üçtərəfli Bəyanatı imzalasalar da, qisasçılıqdan əl çəkmədiklərini, sərsəm xülyaları başlarından çıxarmadıqlarını müxtəlif formada səsləndirirlər.

Seçim yenə də Ermənistanındır!

Sülh və əməkdaşlıq, yoxsa dəmir yumruq!

Altılıqda olmaq, yoxsa çoxluğa qarşı çıxmaq!

“Böyük Ermənistan” söyləyərək kiçik Ermənistanı da itirmək, yoxsa dilənçi və məhv olmuş vəziyyətdən qurtulmaq!

Şuşa Bəyannaməsi həm də Ermənistanın qurtuluşu üçün sonuncu şansdır!

 

Bəxtiyar SADIQOV

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video