Saz və söz ustadı
"Dil aç telli sazım, Şirvan elindən!.." deyib, telli sazını Qazax elinə, gözəl Qarabağa salam verməyə, Göyəzən dağının zirvəsini gəzməyə səsləyən, şair Vaqiflə birlikdə Cıdır düzündə gəzib-dolaşmağı arzulayan, şeir süfrəsi açıb sənətsevərləri söz məclisinə dəvət edən, pərdə-pərdə ötərək səs-səsə verib Vurğunun gəzdiyi yerləri soraqlayan aşıq Əhməd bu gözəl qoşmasının dili ilə Azərbaycan təbiətinin, coğrafi məkanının canlı bir mənzərəsini yaratmışdır.
Aşıq Əhmədin şeirinə qoşulan bu mahnını ilk dəfə 50-55 il bundan əvvəl, toy şənliyində aşıq Məmmədağa Babayevin ifasında eşitmişəm. Ta o vaxtlardan bəri bu şux və oynaq mahnı dillərdən düşmür, məclisləri şənləndirir, insanlara zövq verir, xoş duyğular bəxş edir.
Aşıq Əhməd Rüstəmov Azərbaycan ozan-aşıq sənətinin görkəmli nümayəndələrindən biri olmaqla özündən sonra zəngin, məzmunlu, əhatəli yaradıcılıq irsi qoyub getmişdir. Başdan-başa şair təbli, tükənməz və coşqun yaradıcılıq ilhamına malik sənətkar idi. Sözün əsl mənasında, sənət fədaisi idi. O, ifaçı aşıq kimi sənətə gəldi, yaradıcı aşıq kimi sənət zirvəsinə yüksəldi, ustad aşıq kimi dünyadan köçdü. Aşıq Əhməd öz sazı, sözü, bir-birindən maraqlı dastanları ilə uzun illər məclislər yaraşığı olmuş, el şənliklərində, dövlət tədbirlərində əsl sənət nümayiş etdirmişdir. Bir neçə dəfə Bakıda - Azərbaycan Dövlət Filarmoniyasında onun maraqlı ifaları, xüsusilə də özünəməxsus bir istedadla söz demək, bədahətən şeir qoşmaq məharəti insanlarda heyranlıq yaradıb.
Vaxtilə özünün dediyi kimi, lap kiçik yaşlarından sənəti duyan, sözün qüdrətinə aludə olan, canında-qanında yaradıcılıq duyğusu, yaradıcılıq istəyi tüğyan edən aşıq Əhməd sevib-seçdiyi sənət yolunda uğurla irəliləmiş, ustad səviyyəsinə yüksəlmişdir.
O, 1921-ci ildə Kürdəmir rayonunun Carlı kəndində dünyaya gəlib. Əhməd dörd yaşında ikən atası Ədil bəy sovetləşmə dövrünün ilk repressiya qurbanlarından olub. İlk sənət dərslərini uşaq vaxtı kəndlərindəki toy məclislərindən, bu toylarda çalıb-oxuyan aşıqlardan, xanəndələrdən alıb. Ömrünün 60 ilini aşıq sənətimizin inkişafına və təbliğinə həsr etmiş aşıq Əhmədin şeirləri, qoşmaları bir çox aşıq və xanəndələrin, müğənnilərin repertuarında geniş yer tutur.
1978-ci il fevralın 11-də Bakıda A.Şərifzadə adına Aktyor evində aşıq Əhmədin yaradıcılıq gecəsi keçirilmişdi. Xalq yaradıcılığı sahəsində nümunəvi xidmətlərinə görə aşıq Əhməd Rüstəmova 1989-cu ildə "Əməkdar mədəniyyət işçisi" fəxri adı verilmişdir. Azərbaycan Yazıçılar Birliyinin üzvü olan Aşıq Əhməd 2008-ci il avqustun 12-də vəfat etmişdir.
Müdriklərin dediyi belə bir söz var: "Sənətkar ölmür..." Əsl sənətkarı yaratdıqları yaşadır. Necə ki, hamımızın sevimlisi ustad sənətkar aşıq Əhməd öz gözəl əsərləri ilə - mənalı, məzmunlu şeir və qoşmaları, dastanları, xoş xatirələri ilə daim bizim qəlbimizdədir...
...Həmin gün Kürdəmirdə əsl canlanma vardı. Ustad aşıq Əhmədin anadan olmasının 90 illiyi münasibətilə yubiley mərasimi keçirilirdi.
Mərasim iştirakçıları əvvəlcə Kürdəmir şəhərindəki Fəxri xiyabana gələrək aşıq Əhmədin məzarını ziyarət etdilər, abidə önünə təzə-tər gül-çiçək dəstələri qoydular. Sonra mərasim N.Nərimanov adına Kürdəmir rayon Mədəniyyət evində davam etdirildi. Mədəniyyət evinin foyesində aşıq Əhmədin vaxtilə nəşr olunmuş kitabları, eləcə də ona həsr edilmiş əsərlər, qəzet məqalələri, ustad sənətkarın həyatını yaşadan fotoşəkillər sərgilənmişdi.
Mədəniyyət evində keçirilən yubiley mərasimini giriş sözü ilə rayon mədəniyyət və turizm şöbəsinin müdiri Vaqif Alıyev açdı. Yubiley mərasimində iştirak edən Kürdəmir Rayon İcra Hakimiyyətinin başçısı Fəxrəddin Məlikov məclis iştirakçılarını salamladı. Aşıq Əhmədin həyat və yaradıcılığı barədə ətraflı danışdı. Ölkəmizdə mədəniyyətin inkişafına, sənətə və sənətkarlara göstərdikləri yüksək diqqət və qayğıya görə dövlət başçısı İlham Əliyevə və Heydər Əliyev Fondunun Prezidenti Mehriban xanım Əliyevaya rayon ictimaiyyəti adından dərin minnətdarlığını bildirdi.
Yubiley mərasimində aşıq Əhmədin həyat və yaradıcılığından ətraflı bəhs edən videoçarx nümayiş etdirildi. Folklorçu alimlər - Seyfəddin Qəniyev, Elxan Məmmədli, Yaqut Bahadurqızı aşıq Əhməd yaradıcılığının xüsusiyyətlərindən danışdılar. Şairlərdən Kərəm Kürqıraqlı, Abduləziz Xanəhmədoğlu ustad aşıq Əhmədə həsr etdikləri şeirlərini söylədilər.
Ustadın sənətindən bəhrələnmiş aşıq Yanvar, aşıq Əhliman Şirvanlı, aşıq Elman Talıstanlı, aşıq Məhəmməd Şirvanlı, aşıq-xanəndə Əvəzxan Xankişiyev, müğənni Ağacan Novruzov, Nəsrulla, həmçinin aşıq Əhmədin sonuncu şagirdi aşıq Qəlbinur İbrahimli ustadın sözlərinə qoşulmuş mahnıları ifa etdilər.
Yubiley mərasiminin iştirakçıları belə bir fikir ifadə etdilər ki, aşıq Əhmədin irsi daim geniş təbliğ olunaraq gələcək nəsillərə çatdırılmalıdır. Çünki bunlar folklorumuzun, ulu aşıq sənətimizin dəyərli nümunələridir.
Tofiq ABDULLAYEV,
Respublika Xatirə Kitabı redaksiyasının əməkdaşı
Digər Xəbərlər
QƏZETİN ÇAP VERSİYASI
XƏBƏR LENTİ Bütün xəbərlər
Bill Qeyts: Süni intellekt gələcəkdə asan tapşırıqları da yerinə yetirə bilməyəcək
29 Mart
İqlim dəyişikliyi saatların bir saniyə itirməsinə səbəb ola bilər
29 Mart
Azərbaycanın su qıtlığı probleminin həllində əldə edilən irəliləyişlər müzakirə edilib...
29 Mart
ABŞ husilərə aid daha dörd PUA-nın vurulduğunu bildirib
29 Mart
Türkiyədə FETÖ ilə əlaqədə şübhəli bilinən daha 70 nəfər saxlanılıb
29 Mart
Milli Məclis 21 məsələnin müzakirəsinə başlayıb
29 Mart
Ötən il Azərbaycan iqtisadiyyatına olan birbaşa xarici investisiyaların həcmi açıqlanıb
29 Mart
“Anev-2024 Türk dünyasının mədəniyyət paytaxtı” ilinin açılış mərasimi keçirilib
29 Mart
Ombudsman 31 Mart – Azərbaycanlıların Soyqırımı Günü ilə əlaqədar bəyanat yayıb
29 Mart
Xankəndidə silah-sursat aşkarlanıb
29 Mart
DİQQƏT ÇƏKƏNLƏR
Bütöv Azərbaycanın Zəfər tonqalı20 Mart 2024
Parçalanmış dünyanın bərpasına töhfə19 Mart 2024
QHT-lərin maliyyə tələbi Agentliyin illik qrant büdcəsindən 4 dəfə çoxdur - MÜSAHİBƏ18 Mart 2024
Prezident İlham Əliyev və NATO-nun Baş katibi Yens Stoltenberq mətbuata bəyanatla çıxış ediblər YE...17 Mart 2024
Fransa növbəti dəfə ifşa olundu16 Mart 2024
ÇOX OXUNANLAR
Xoş niyyətlər bayramı20 Mart 2024
Azərbaycan Qafqazda sülhü də bərqərar edəcək19 Mart 2024
Prezident İlham Əliyev Xankəndi şəhərində Novruz tonqalını alovlandırıb və Azərbaycan xalqını bayram...18 Mart 2024
Natəvanın heykəlinə qarşı vandalizm Fransa tarixinin utancverici hadisəsidir17 Mart 2024
Bakı Forumunda Azərbaycanın COP29-a evsahibliyi etməsi dəstəkləndi16 Mart 2024
Hücum diplomatiyasından hücum taktikasına14 Mart 2024
OXUCU MƏKTUBLARI
NƏŞRLƏRİMİZ
BAŞ REDAKTORDAN
Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!